熱門:

2019年10月4日 即巿股評 港股直擊

【盤房來料】傳聞引入《緊急法》令市場變數大增

隔晚美股經過兩日急挫後,終於見反彈,由於三個主要指數都逼近重要支持位,作出技術反彈亦好合理。至於港股呢,唔知係咪噚日午後彈咗先,今早高開低走,表現麻麻。恒指高開59點,報26169點,但阿Man都講過26200-26300阻力唔少,港股升唔得幾多已迅速回落。二萬六關得而復失。半日最多跌185點,見半日低位25924點。恒指中午報收25969點,跌幅略為收窄至140點;國指則跌42點,報收10178點。

其實噚日午後港股突然拗腰倒升,有缸湖傳聞話係因為政府有意引用《緊急情況規例條例》(簡稱《緊急法》)為禁蒙面即時立法,香港有望解決當下亂局,所以港股要倒升賀一賀。若然呢個真係噚日港股反彈嘅原因,阿Man真係接受唔倒囉。9月初當政府宣布撤回《逃犯條例》修訂,港股即急升千點,呢個還可以理解,話晒政府都叫做回應咗示威者嘅其中一個訴求。但噚日話通過禁蒙面法令個市回升,就真係講唔過去。阿Man先唔講禁蒙面有乜嘢負面影響先,但要透過引入《緊急法》嚟通過禁蒙面,咁就真係大件事。

大家不妨去政府官方網頁,睇法清《緊急法》內容先,「在行政長官會同行政會議認為屬緊急情況或危害公安的情況時,行政長官會同行政會議可訂立任何他認為合乎公眾利益的規例。」呢一點嘅意思係,阿特首加埋佢行政會議班馬仔,幾乎可以想點就點,以有關可以訂立嘅規例就有就N咁多點,真係由A至N咁多點。其中一點睇到阿Man心驚驚嘅係,A點嘅【對刊物、文字、地圖、圖則、照片、通訊及通訊方法的檢查、管制及壓制】;以及F點嘅對【財產及其使用作出的撥配、管制、沒收及處置】。點解呢,因為呢兩點係相當切身嘅問題,A點一旦實施,阿Man可能連寫篇稿都冇自由,或者用社交平台都冇自由;至於F點講到財產喎,有邊個唔驚,特首可以管埋你啲錢呀喂,大佬,係人都驚啦。

正正因為《緊急法》有咁嘅內容,引用起上嚟可以話係核彈級手段,尤其係錢銀財產受到威脅,對自由資本市場係嚴重打擊。當然刻下講緊只係藉此通過禁蒙面法,但之後呢? 喺龍門任人擺嘅情況下,外資會唔會擔心而加快撤離,甚至一走了知? 既然咁多不明朗同不穩定因素存在,點解個市會因為咁而回升呢……可能今日有人睇清楚之後,港股回番好正常,就唔唔大跌,都唔會因為咁而升呀。

至於落實引入《緊急法》後會點,阿Man冇水晶球答你唔倒,但純睇技術走勢的話,一日恒指仍守住25600至25700,而上面26200至26300阻力又唔破的話,咪行住Range先囉。只係今日又到周末前夕,加上外面傳得沸騰引入《緊急法》而通過禁蒙面法最快呢兩日實施,咁大個不明朗因素,係咪食住花生唔做嘢穩陣啲呢??

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads