熱門:

2019年10月3日 即巿股評 港股直擊

【盤房來料】濠賭股間唔中死貓彈

中美貿易談判一切準備就緒,本來都好哋哋,但美國好似不甘寂寞咁,表示擬啟動向75億美元歐盟商品徵收關稅,歐盟當然唔會咁易屈服,較早前已放風,若然美國搞搞震,歐盟一定覆桌。歐美股市隔晚有得震,冇得瞓,再加理美國呢兩日公布嘅經濟數據,反映美國經濟惡化中,美股隔晚跌到走晒樣,三大指數跌逾1%,連續第二日急挫。不過港股繼續好似噚日咁款……力托,喺亞太區股市中表現較佳。

恒指低開211點,開市最多跌233點,半日低位25809點,竟然未跌穿昨日低位,其後跌幅繼續收窄,曾僅跌76點,見過25966點半日高位,受制於26000點。恒指中午報收25918點,跌124點;國企指數一午報10151點,跌31點。

雖然指數跌百幾點唔算多,至少恒指仲力守25600至25700呢個重要支持位,前者接近250周線(25602點),後者則接近50月線(25698點),呢個重要支持暫時力守,但係唔少重磅股表現都係麻麻。大笨象(00005)唔使問繼續跌,穿咗60元呢個大位,今日再跌1.5%。三桶油亦腳軟,講咗N次油價係目前環球經濟狀況下,實在好難勁升,所以石油股高追必遇伏,幾乎百發百中。而中海油(00883)更被大行調低評級,股價半日跌1.7%。較為奇怪係今日濠賭股竟然逆市上升,好老實澳門博彩收入買少見少,呢個板塊近年幾都廢咗武功,間唔中死貓彈兩下,就係可以不理。

內需股真係高處未算高,持續跑贏大市,今日兩件重量級內需股美團(03690)及新丁百威亞太(01876)繼續尋頂,後者差些少到短期目標30元,有貨要留意住係咪要隨時食糊。而阿Man早於年初已有推介嘅安踏體育(02020),即使曾遭沽空機構狙擊,但真金不怕洪爐火,股價再創新高,半日升逾3%,多得有大行調升評級及目標價。既然資金繼續撐內需股,阿Man認為又係時候望望蒙牛(02319),連續升番幾個交易日,睇吓有冇本事上番30元,並收復其他移動平均線,目標睇番32元,再跌穿29元要識執生。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads