熱門:

2019年9月26日 即巿股評 港股直擊

【盤房來料】港股反彈乏力二萬六爭持

侵侵放風中美貿易談判好可以達成協議,而美國財長亦表示約咗中國副總理劉鶴,喺10月7 日進行新一輪談判,消息刺激隔晚美股做好,港股亦隨外國反彈,可惜一個弱底市彈力實在不足,恒指喺二萬六關爭持。

恒指高開129點,報26075點後,最叻都係升過154點,見半日高位26099點,其後升幅收窄至35點,見25980點半日低位。恒指中午報收25985點,升40點;國指則報收10192點,升24點。咁嘅反彈力度實在令人失望,半日成交額只有362億元,可見缸邊友都唔多願入場。

藍籌重磅股個別發展,連日回購嘅騰訊(00700)跌足八個交易日後終見反彈,不過家陣股價都只回升至330元水平,弱勢依然未改。其實騰訊舵手馬化騰講到要退落嚟(只係卸任騰訊徵信法定代表人),理論上係唔會影響集團正常運作,不過難免令投資者可能有其他猜測,對其打咗個折扣。至於獲政府以股代息增持嘅港交所(00388),但港交所會否因此大翻身,阿Man對此係覺得呢個以股代息嘅增持,實在唔代表嘅乜,反而有傳聞指港交所搵咗投行做軍師,執意敵意收購倫交所,呢個發展先係左右其股價走勢更重要因素。純睇技術走勢,港交所連跌多日至接近220元附近,點都有啲支持而會作出技術反彈,不過睇埋周線圖明顯出咗三隻烏鴉利淡訊號,後市走勢當然唔樂觀。

今日半日升幅最大藍籌股係新世界發展(00017),集團噚日宣布全年基本溢利增加一成嘅同時,宣布捐出300萬平方呎農地建屋,股價半日升3.4%。其實發展農地嘅過程係漫長兼會遇上多種問題,唔係你話捐塊地出嚟,咁就可以拿拿臨起番一萬幾千個單位咁容易。只係較早前已有政黨建議政府透過引用《收回土地條例》向地主佬開刀收地,以趕快增加房屋供應,話唔定新世界諗住反正遲早都受呢條例影響,要嘔番部分農地出嚟,倒不如自己先發制人,捐出百萬呢農地,有型得嚟仲攞埋個光環。先勿論新世界呢吓動作對公司盈利實際上有冇幫助,但喺公司形象方便,當然搶倒分,股價上升都算反映咗管理層溢價。

侵侵一句就令市場憧憬中美貿易戰有望短期內解決,之前受貿戰影響嘅手設股,當然乘機落鑊。不過呢個板塊呢期都斷斷續續咁炒下停下,轉個頭中美又唔啱傾,風向隨時變,總之都係參與炒作要轉身快,自己執生。

明日期指結算,阿Man相信指數呢兩日跌穿25800點支持機會唔大,暫時都係較為牛皮,不過10月可以話危機四伏,除咗米字旗國要面對脫歐死線,仲有中美貿易談判咪以為坐定笠六,再加埋美國國會已受理香港民主與人權法案,將會喺下月進行表決,七國咁亂,暫時都係保守啲好。值得一提係有關港股孖展信貸收緊措施將會喺下月4日正式實行,呢排已見唔少股仔出現單日急跌逾五成嘅場面,估計呢啲case陸續有嚟。

麥狄文

(徐狄怡‧證監會持牌人)

(編按:本文有關騰訊的內容表述經過後期修改,不便之處,祈諒。)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads