港股連跌六個交易日,跌逾過千點後,今日終見反彈,表現反覆。恒指高開77點後,升近百點後掉頭向下,一度倒跌15點報26207點。其後A股帶動下回升,最多升169點,見半日高位26391點。恒指中午報收26305點,升83點;國指則升13點,半日報收10301點。
重磅藍籌股主要向上,不過火車頭騰訊(00700)即使經過多日回購,仍未見有上升動力,暫時喺20日及250日線匯聚區,股價仍被其他幾條移動平均線壓住,阻力由345元至350元,下移至340元至345元,一副唔生唔死咁嘅樣,半日靠穩微升0.2%。今日由中移動(00941)、友邦(01299)及大笨象(00005)合力撐起大市,三股已合共向恒指貢獻88點升幅。
中東地緣政治風險上升,油價上周急升後,暫時都叫企得住腳,三桶油股價則個別發展。不過醫藥股被開刀,內地今日下午將公布第二輪帶量採購招標結果,資金乘機逃離呢個板塊,所有醫藥股無一倖免。中生製藥(01177)跌6.5%,藍籌股中包尾,其他醫藥股普遍跌2%以上。
雖然醫藥股長線仲有得諗,但風頭火勢都係睇定些少好,守住莫買當頭跌呢個宗旨。教育股同樣係長線仍有前途嘅板塊,但要識得選擇受政策影響較少,集中專上教育嘅教育股。中教(00839)購澳洲國王學院,半日升4.4%,其他教育股亦有資金流入。
至於另一個阿Man一向唔睇好嘅板塊濠賭股,事實上濠賭股呢一年以嚟,又確係冇乜運行,而大行花旗引述渠道資料指上周澳門日均博彩收益僅6.86億澳門元,按周跌12.6%,呢個跌幅都幾驚人。不過濠賭股跌幅尚算溫和,但當然都唔建議呢啲位入貨,尤其大部份濠賭股圖表已經走晒樣。
港股今日雖然反彈,只係20日線(26449點)可能變成阻力,暫時恒指喺保力加通道中軸附近爭持,估計喺周五期指結算日前,除非有特別消息,否則暫時應唔會下試保力加通道底部,即25358點。至於結算過後,港股何去何從,貿易戰談判消息,將左右大市去向。
麥狄文
(徐狄怡‧證監會持牌人)