熱門:

2019年9月24日 即巿股評 港股直擊

【輪證贏家】國慶前會維穩嗎?

9點40分返到公司就見到新聞組同事開住個電視機等林鄭出嚟講話,其實星期四(9月26日)都有佢首場「與公眾對話」啦,仲有咩好講呢?(呢句嘢可能係大家最想同佢講嘅一堆說話其中一句)

預佢例遲,都係轉返去財經台先,見依家9點42分時恒指做26241點,升19點,暫呈高開低收;而噚日手痕向個股埋手,睇中咗隻港交所(00388),喺噚日下晝1點30分至1點45分,SlowSTC(14,3)再次落返去超賣時,基於見佢朝早走勢怪怪的咁,所以喺注碼上控制以圖減輕落場壓力。喺嗰陣時(62690)高低位做過$0.093/$0.085,平均買入價就係$0.089。

可能就正正注碼細,一心諗住等收市再等收工,誰不知喺3點時恒指無啦啦發威,再望望港交所,喺3點10分開始嚟料,見佢5分鐘圖上SlowSTC(14,3)開始踏入「8」字頭見超買,心諗再比多少少時間佢,睇吓會唔會上到「9」字頭先,等到3點半, %K線終於見「9」字,於是就放走隻(62690)。其實喺下晝3點至3點40分呢段時間,港交所嘅5分鐘圖SlowSTC(14,3)都係見「8」字頭以上超買位,按呢段時間嘅高低位$0.109/$0.095計,平均賣出價就係$0.102,對比之前買入價,day trade賺幅14.6%。「係咪早知就大注啲呢?」又唔好咁講,注碼大細都係策略嘅一種,細注啲無咁大壓力時,你做嘅決定都會有信心/準確啲。

依家10點6分,恒指做緊26300點,升77點,回復返今朝開市時個水平,日線圖見暫呈「十字星」,而成粒燭今日就處於保歷加下降通道裏面,SLowSTC(14,3)兩線仍然向下,不過見保歷加通道口有開始收窄之嫌,且見14RSI見回升,似乎恒指六連跌之後都未必想直插落保歷加通道底(25359點)度,前面新聞組同事提醒我:「一陣間有個國慶記者會,會做埋直播...」係喎,今日9月24號,仲有一個星期就「10‧1」國慶日啦喎,即係又有假放啦喎,又即係話「維穩」又開始嚟料啦喎,怪不得10點16分抬頭望望電視機,恒指無啦啦發力升140點,做緊26363點啦。

開埋恒指牛熊證街貨圖,依家見上方熊證仍然係26900至26999點為最近街貨層,亦都係重貨區,呢度有相當於1141張期指,雖然係好耐無見嘅過千張期指街貨,但同現價比都真係仲有啲距離。

始終現價同下方牛證行得埋啲,26100至26199點就已經係最貼價嘅第一層牛證,呢度有相當於408張期指,數量真係唔算多;但經過今日稍升之後,會唔會吸引更多資金做好倉?都真係唔排除呢個可能性。而牛熊中間位(26900+26199)/2=26549.5,同頭先mark底嘅價26363點,只係相差186.5點,on top加返頭先mark低埋嘅升幅140點,講緊假設今日個市升326.5點嘅話,就會上到牛熊證中間位,呢個點數唔算多但又起到看似「維穩」作用,何樂而不為呢?

不過,對於落場嚟講,上方遠但重貨,下方近但少貨,上牛熊中間位又唔難,咁多個可能性會發生嘅情況之下,選擇做旁觀者就算。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads