熱門:

2019年9月20日 即巿股評 港股直擊

【輪證贏家】財不入急門

噚日隻進取恒指熊(55811)同安全距離恒指熊(55832)全數Day Trade成功,但基於噚日恒指向下殺咗三層牛證街貨之後,都要睇睇啲街貨點樣重新部署先再諗下一步做乜,於是收割之後就係等收工,跟住再等夠鐘離開公司,同兩位老友強少同藍哥,再加埋強少愛妻四條友去雞煲,好彩呢三個後生仔都仲肯同我呢個幾廿歲出嚟玩啫。

依家9點55分,返到公司又沖定杯靚茶開晒電視電腦,可能噚晚開心得滯,再加埋今日Happy Friday,lunch都未食就已經有種放假mode;唔止我係咁,個市都係咁,開市到依家見日線圖粒燭嚴格嚟講應該係「倒T星」,但佢支腳短到呢...驟眼睇仲以為係一條橫線,好似啲輪圖無成交咁款,不過還好嘅係仲叫做喺條20天線/保歷加通道中軸(26393點)上面,而下方SlowSTC(14,3)仍然都係下行中,但留心14RSI反而有少少勢頭向上,唔通呢個就係10天線(26856點)升穿50天線(26811點)嘅「黃金交叉」威力?

開埋恒指牛熊證街貨圖睇先,原先噚日估下方牛證26000至26099點有機會變成重貨區,無其他嘅,純因為整點數位嘛,但結果今日見到呢一層只有相當於357張期指,重貨區仍然係25800至25899點,有相當於907張期指。而牛證最貼價嘅26300至26399點就有相當於652張期指,總數唔多但新增嚟講係最多。

至於上方熊證無新增區域,但26900至26999點呢層最貼價嘅就變成重貨區,有相當於689張期指(...嗯...我唔係咁鍾意呢個冧把...),同最貼牛證區一樣,都係最多新增街貨層。

依家10點6分,恒指做緊26519點,升50點,暫時波幅只有112點,而呢個位又同牛熊街貨中間位[(26900+26399)/2=26649.5]相差130.5點,若然話20天線見短線支持彈起嘅話,倒不如真係見到佢有力先至再出手都未遲,反正拆恒指5分鐘圖見喺10點5分時SlowSTC(14,3)落到中軸水平時又再次彈起,呢個位無論牛定熊都唔係入市靚位(再彈返起就更加唔會係入牛博20天線反彈嘅時機);更何況恒指企喺中間位應該大把人落注,就睇吓人哋點落注先囉,唔急嘅。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads