熱門:

2019年9月13日 即巿股評 港股直擊

【盤房來料】短炒車股寧願食少多教訓

中秋佳節,港股都算係咁,至少上半場都算唔錯,都係多得美股隔晚做好,中美貿易關係繼續緩和,更有消息指侵侵考慮跟中國達成臨時貿易協定,雖然家陣仍然十劃未有一撇,但呢個消息足以令美股繼續做好,道指更連升七個交易日。至於香港呢,雖然中秋節一向都係全日市,但今日係星期五,本來都有周末效應,預咗今日港股都會較為靜局。

恒指高開66點後,開市一度跌13點,見過27074點半日低位,其後拗腰向上,半日最多升111點,見過半日高位27198點。恒指半日報收27186點,升98點;國指半日升54點,報收10647點。重磅紅籌股普遍向上,尤其係受貿易戰受累股,今日特別醒升,萬洲(00288)跟申洲(02313)分別升1.4%及2.2%。不過油價有啲腳軟,中海油(00883)跌1%,話咗喺經濟前景麻麻地嘅情況下,油價都係有波幅,冇升幅。至於連續多日進行公司回購嘅騰訊(00700)半日下跌0.2%,似乎350-355元呢個阻力魔咒仍未解得開。

汽車股失驚無神又落鑊,主要係貴陽市取消限購,推高汽車股,唔知大家有冇去過貴州嘅貴陽市,講真阿Man去過,我真係去過。貴州喺全國嚟講唔算乜嘢發達地方,貴陽市亦如此,唔見得貴陽市取消限購令,對汽車股實質有幾大得着。不過缸邊友炒作就總係要搵藉口,汽車股今日普遍上升,而升幅更閒閒地超過2%。而4S零售商升幅更厲害,中升(00881)更創52周新高。只不過阿Man都係嗰句,中美貿易關係緩和,若然雙方就內地全面開放汽車市場達成協議,內地汽車製造業所受衝擊更難以估計,所以呢啲短炒,阿Man寧願食少多教訓。

地產股今日亦見腳軟,政府今天將就一手住宅物業空置稅條例草案刊憲,建議日後法例通過後,運輸及房屋局局長有權以「先訂立後審議」的方式調整空置稅徵收水平等,陀地地產股幾乎全部逆市下跌。

其實莫講話今日大部份公司都因為中秋節提早放工,對住魚缸嘅缸邊友,大部份都自己提早收市,睇番半日成交額得277億,真係少得可憐,個個無心戀戰。恒指升穿26800點再企穩二萬七水平,下周港股傾向繼續回補8月2日下跌裂口,以及收復250日線(27373點)及100日線(27595點),做淡未係時候,建議淡友忍忍手。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads