熱門:

2019年9月6日 即巿股評 港股直擊

【盤房來料】美國議息前港股難再突破

中美雙方已落實下月初於華盛頓舉行新一輪貿易談判,市場憧憬今次談判或有重大突破,加上就業數據表現強勁,刺激美股隔晚上升,三大指數全部升逾1%以上,港股今早亦受帶動,最高逼近26800水平。

恒指高開257點,其後升幅收窄至108點,報26623點半日低位,其後重拾升勢,見過半日高位26790點,創自8月2日以嚟高位。恒指中午報收26672點,半日升157點;國指則升30點,半日報收10415點。

雖然噚日港交所(00388)發生咗死機災難,衍生產品交易於下午二時暫停,但似乎未有對市場帶嚟太大打擊,不過無論點都好,發生咗呢次死機事件之後,日後要加多一項風險管理,就係關於交易系統問題。好似噚日咁,朝早九點幾個期貨trading system已經出現問題,若然仲有未平倉合約,而交易系統仍局部運作的話,好應該先平晒先有倉先。免得出現午後忽然完全停止交易,仲有倉未平的話,肯定噚晚個心就十五十六,尤其持有淡倉嘅,見到美股喪升,更加瞓唔著覺,幸而今日港股唔算好夠力爆升,否則真係死得冤枉。

本來港股喺周三報復式上升後,大有氣勢可以向上回補8月5日遺留嘅下跌裂口,即26480至26918點,可惜都係功虧一簣,連呢一個裂口都補唔倒,更何況26950至27565點再對上一個下跌裂口,港股反彈會否玩完唔敢講,但暫時港股都係偏弱。評級機構惠譽將香港信貸評級由AA+下調至AA,前景展望則為負面,更預測今年香港實際GDP增長為零,2020年則增長只有1.2%。好似慌死香港死得唔夠快,嗱嗱臨加多腳。

隔晚美股科技股表現突出,呢兩日港股呢邊就手機設備股最搶鏡,舜宇(02382)跟瑞聲(02018)分別升4.7%及4.9%,喺最好表現兩隻藍籌。板塊內相關股份亦有理想表現,中興(00763)升幅更接近一成。至至於其他重磅股都係咁上下,普遍上升,但講到上升力度,經過周三喪爆一下之後,呢兩日上升力度只係普普通通。

值得留意係美國今晚會繼續公布就業數據,數據表現或左右下周聯儲局議息結果,勁得滯又話唔減息住,弱得滯當然減息,但又要擔心經濟下滑。總之今晚美股仍存變數,暫時港股會喺26300至26900之間上落,等埋下星期美國議息再有突破。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads