熱門:

2019年8月30日 即巿股評 港股直擊

【盤房來料】望有心人勿自毁香港前途

又係為咗搵個藉口嚟解釋美股嘅連日反彈,中美貿易關係有否真正緩和,大家心裡有數。所以今早港股高開逾300點後,升幅顯著收窄,假的真不了,中美貿易關係目前仍處於水深火熱中,要解決又談何容易。恒指高開308點,報26011點,但已經係半日高位,話咗26000係一個重大阻力,畀你上得到,亦唔企得穩。開市後升幅迅速收窄,升幅曾抹去得番三分一,見半日低位25807點。中午恒指報收25880點,升177點;國指則升123點,報收10125點。

騰訊(00700)力守320元,今早回升1.8%,半日報收325.8元,但老老實實日線圖走晒樣,暫時半日仲係收陰燭,加上噚日低位已跌穿5月底低位,320元守得幾耐,真係冇水晶球又點會知。若然閣下係QQ忠實擁護者,亦要好好審視一下,仲係咪要死守住呢隻所謂愛股。

至於三桶油今日表現尚算勇猛,加上中海油(00883)派完成績表後,有大行唱好,刺激股價半日升6.6%,其餘中石油(00857)跟中石化(00386)半日分別升4.8%及2.4%,三桶油已貢獻恒指60點升幅。不過都係嗰句,三桶油出晒名難炒,加上全球經濟持續惡化的話,油價走勢只會繼續有波幅而冇升幅,只要油價走勢再度走弱,三桶油腳軟也是常識吧…….

阿Man其實唔多明白,雖然美國有意略為放鬆對其制裁,但實際上美國未見完全放過華為,而大家都心知肚明,華為仍處於中美貿易戰風眼之中,求其搵個藉口中美貿易戰有所緩和,就再將科技股落鑊,而有缸邊友因此而又做清兵高追,其實會否有點衝動。對於科技股短線反彈,阿Man認為做花生友穩陣,今日舜宇(02382)可以彈6.2%,半日高收111元創一年高位,只要美國再對內地科技企業搞一兩個小動作,相關股份可以即時走樣變臉。

對於港股9月份表現,阿Man已表示唔會太樂觀,當然目前市場聚焦中美兩個重返談判桌,以及各國央行繼續放水,或可以令股市有一刻反彈,可惜恒指技術走勢確已轉弱,暫時能企穩25000點之上,但恒指反彈若未能重返26300點,完全回補本周一下跌裂口,呢個反彈又點似樣。反而恒指一旦再失守頸線重要支持,即25000至25300點,港股可以好肯定會迎來下一波跌浪。值得留意係除咗外在因素之外,香港內部問題繼續發酵,若然有心人令情況繼續惡化,甚至一意孤行實施乜乜物物惡法的話,將完全斷送香港前途,期望有心人為咗香港福祉,要三思而後行。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads