熱門:

2019年8月29日 即巿股評 港股直擊

【盤房來料】終極死亡交叉終於出現

相信大家今日唔會關心美股隔晚彈咗幾多,港股又跟唔上呢件事,大家應該比較關心嘅係,恒指又一次出現終極死亡交叉,即係50日線(約27423)正式跌穿250日線(約27433),過去20年以嚟,港股一共出現12次同樣情況,其中7 次均出現大跌市,當中跌得最勁係2008年金融海嘯,喺3月份出現呢個終極死亡交叉之後,至10月個市見底,累積跌幅逾五成。近近哋講番舊年一次,恒指喺7月底出現終極死亡交叉,恒指最多跌至10月見底,當時以出現交叉計,累積跌幅達14%。

舊年死亡交叉出現,主要係受貿易戰爆發影響,而今日港股再現終極死亡交叉之際,貿易戰仍未平息,更發展至貨幣戰,而令一個致命弱點係,由逃犯條例修訂所引發嘅社會運動,爆發近三個月以嚟,愈演愈烈,外憂內患之下,港股9月開局相信難樂觀。至於今次死叉再現,港股要跌幾多,從技術走勢分析,恒指日線若再失25300點,好大機會先向24000點進發,一旦24000失守,21800至22000呢個下跌目標都相當近磅。其實24000點正好係2017年2月至4月期間,恒指周線一個橫行平台,其後平台突破,港股則扶搖直上,升浪至2018年1月才結束。估計24000關失守的話,港股跌勢將加快,跌幅亦會擴大。

講完個市大方向,睇番今日個市略為低開9點之後,跌幅隨即擴大,最多跌242點,見半日低位25372點,其後跌勢有所緩和,跌幅收窄至百點之內。恒指中午報收25524點,跌91點;國指則跌62點,報9918點。

重磅藍籌股個別發展,蒙牛(02319)派出一份略遜預期嘅成績表,股價插5.8%,績後見光死。不過中生製藥(01177)同樣成績,股價反覆,早段股價跌逾5%至10.06元低位,不過阿Man喺社交平台都有建議過粉絲,以10元作止賺位,跌穿10元就棄船,否則中生製藥仍值得持有,結果股價守住支持位後拗腰回升,半日倒升5.2%,再創逾一年高位。其他醫藥股表現不俗,大部份都逆市向上,而阿Man對半新股翰森製藥(03692)繼續睇好,半日升2.4%,此股未來加入藍籌大熱之選。

今日要講講業績表現兩極化嘅中資金融股,呢個板塊陸續公布業績,相關股份表現有好有壞,不過阿Man一直強調,尤其內銀股面對違約風險上升,呆壞帳惡化等問題,表現睇落估值有幾平,息率有幾吸引都好,只係表現嘅事,買股買前景,以整個行業前景嚟睇,內銀股仍未係可以接貨嘅時候。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads