熱門:

2019年8月27日 即巿股評 港股直擊

【盤房來料】港股裂口未回補仍未脫險

隔晚美股反彈,侵侵又話中國打電話畀佢哋,大家仲有計傾,只不過中國就話冇講電話喎,只係技術層面保持聯絡,至於點為之技術層面,阿Man真係識條鐵咩……佢哋雙方話保持聯絡咪得囉,重點係有聯絡,唔代表有溝通,雙方能否達成協議更成疑問,所以對於反彈原因,都係維持原判,技術上超賣咪反彈囉,唔使特別搵個理由去解釋。

恒指高開35點,呢個所謂反彈都可算有心無力,開市無耐大眾老母又出嚟記招,搞到個市掉頭向下,最多跌71點,見過25609點半日低位。其後A股向上拉動港股回升,最多升84點,半日高位見25764點,10日線(約25894)繼續影都冇。恒指中午報收25707點,升26點;國指則升25點,報收10039點。其實港股反彈係噚日午後,見倒侵侵喺社交平台發帖後反彈,由低位計都彈咗500點過外,可惜噚日裂口未回補,呢兩日唔盡快回補裂口,兼企穩喺26000點之上,港股仍未脫險。

A股今日之所以表現咁勇,咪講係乜嘢報復式反彈,純粹因為MSCI今日收市後提升A股納入因子,擴容效應令追蹤相關指數基金不得不掃貨,過咗呢一轉強制掃貨,A股隨時又打回原形都唔出奇。暫時港股只可以算喘定,但仍未見一個似樣反彈,大方向仍呈現一浪低於一浪走勢,後市暫難樂觀。

講番重磅股方面,都係個別發展,當中唔見得有重磅藍籌股表現突出,要數最好表現嘅藍籌係碧桂園(02007),半日升4.6%,原因係公司回購股份。而超人亦有出手增持股份,喺上星期透過基金會斥資逾4億元,增持長實(01113)股份。不過超人增持股份未必即時對股價帶嚟刺激,今年超人喺4月底跌市前,及於今年初均有增持,只不過今次增持股份數目較前兩次多。不過由年初至今幾次增持,超人動用資金都只係6億咁上下,呢個數目對超人嚟講只係散子幾個,一般凡夫俗子好難下下跟住搵食。

值得留意係之前曾被沽空機構狙擊嘅安踏體育(02020),今早股價再創新高,話咗真金不怕洪爐火,有業績支持,事實勝於雄辯,績後亦獲大行唱好,股價半日升7%。安踏股價繼續變風箏,街貨少同埋貨源盡入基金強中手係主要原因,之前沽空機構狙擊未見基金大舉拋貨,睇嚟沽空機構喺安踏一戰應滑鐵盧。

其實價值從來只會遲到,而不會缺席,好似之前阿Man曾推介嘅半新股東方教育(00667),股價今日同樣創上市後新高。當然於招股時建議認購,雖然上市初期表現麻麻,但堅持落去,股價又一直守住10元,事實證明呢兩個幾三個月坐嘅貨係無白坐。而翰森製藥(03692)同樣係阿Man睇好嘅半新股,今日同樣創上市新高,阿Man有信心此股定非池中物,話唔定有朝一日可加入藍籌大家庭,同樣值得中長線投資。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads