熱門:

2019年8月21日 即巿股評 港股直擊

【盤房來料】小米員工認購權數目成謎 小股東無從掌握

隔晚美股回軟,本來上日仲話市場憧憬中美貿易關係好轉,貿易戰有所緩和,一夜之間點解又好似局勢急轉直下,其實整個大局一直未有改變,所以噚日阿Man已表示對於美股反彈,更大理由係因為本來倒掛得厲害嘅美債孳息曲線有所改善,而並唔係中美貿易關係有所改善,對此莫過份解讀,並非事後孔明,只因事實正如此。而隔晚美股回軟,正正因為市場仍受對經濟前景悲觀情緒所困擾。不過美國國務郷表示,美國與中國下周或10天後將繼續進行談判,確令中港兩地股市暫時靠穩,至於雙方談判有否進展,阿Man取態雖未至悲觀,但仍較為保守。

恒指早段低開71點後,開市一度跌155點,見過26075點半日低位,暫時二萬六似乎有不俗支持,大市亦止跌回升43點,高見26275點。恒指半日報收26260點,升28點;國指則半日升45點,中午報收10177點。

藍籌重磅股個別發展,騰訊(00700)有新遊戲獲審批,但股價半日僅升0.6%,目前仍處於335至340元反彈阻力。其他重磅股表現平平,當中以噚日派成績表嘅煤氣(00003)表現較差,雖然其透過另一上市公司投資內地市場業務表現不俗,但不少大行均認為今年難以再慷慨派息,不少大行均下調其目標價,半日股價挫半成,眾多藍籌之中跑第尾。

一向係阿Man支持嘅板塊醫藥股,今日上半場表現不俗,而內地藥品目錄調整,當中128種高價藥或進談判名單,個別藥股持續向上。而阿Man愛股中生製藥(01177)跟石藥(01093)半日升逾6%,成為表現最好兩隻藍籌。由於中生製藥已到達之前阿Man所訂目標價10元,若然仍有貨嚟手,不妨定番個止賺價喺10元繼續持有。其他醫藥股閒閒地升2%以上,呢個板塊係今年少數跑贏大市股份。反正喺整體大市環境一般情況下,醫藥股呢個板塊已經算係咁。

記得阿Man係中國東方教育(00667)上市無耐已建議大家收集,而習大大最近考察時,表示要好好發展教育,特別係職業教育,而中國東方開正呢一瓣。股價今日曾爆升8%創上市新高,半日收13.78元,亦升逾6%。

小米(01810)公布業績,預算業績麻麻,早兩日炒高好可能係今日業績過後要派發,集團表示要打造小米手機追趕上華為,講真阿Man係粉果一名,對其他手機興趣有限,但聽見小米話要追掃上華為,真係啼笑皆非。小米最令投資者唔放心係,集團不斷派公紙畀高層及員工,至慘係小股東未能掌握全部資訊,又攤薄效應無數得計,又點可以放心投資落一間不具透明度嘅公司。睇嚟股價仍需要繼續向下尋底。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。