熱門:

2019年8月2日 即巿股評 港股直擊

【輪證贏家】係咪好想博反彈呢?

唔知係咪美國總統特朗普嫌聯儲局主席鮑威爾減息減得唔夠狠,定擔心我哋香港人唔夠力去對付西環,噚晚玩突襲,宣布將餘下3000億美元中國貨關稅稅率升至25%,仲話唔憂慮股市下跌。美股由噚晚本來好地地最多升291點,至收市倒跌280點。今朝早起身開電視見到日經跌逾400點,都估到恒指唔會好得去邊。

搭緊巴士返工時,戰友Jack send嚟一張公司Pantry嘅相,就係喺部飲水機上面有幾張memo紙喺度,寫咗啲咩?我相信大家都會估得到。差唔多同一時間,老樓劉兆昌whatsapp我,問我「恒指今日會冧多少?」我好懶咁forward咗今朝早商輪send比我嘅其中一個message比佢:「恒指ADR指數大跌,見27143點...」因為我一隻手拎住個電話,一隻手扶住碌柱,單手打字對我嚟講真係有啲難度。

今朝早開恒一開先無615點,27000點告失守,呢個大裂口一殺就殺咗五層牛證街貨,total食咗3729張期指,「8月先啱啱講始,大戶咁快就要殺定今個月嘅數?」哦,咁特朗普咁樣講一講,順便又乘機先殺一筆啫。依家下方牛證最貼價就係26900至26999點,有相於235張期指,而上方熊證仍然都係28300至28399點,相1207張期指,咁重貨又食得咁深,都應該收割咗啦掛。

睇返恒指日線圖,今日恒指落到個位幾乎等同6月初附近,真係仲爭幾百點就到,如是者呢個7月+8月幾日貨仔,就將成個6月份嘅升幅全數吞噬,SlowSTC(14,3)開始見個位數,而14RSI亦落到30以下水平。而今日呢個大型下跌裂口/消耗性裂口,拉到去6月19日個大型上升裂口/突破性裂口嚟睇,「孤島」已經形成,好明顯係一個轉勢形態,同時都反映出市場暫未接受「孤島」時嘅價位。不過,唔接受還唔接受,個市去到呢啲位SlowSTC(14,3)當然有權繼續低位橫行,而14RSI就賞佢仲有位落,

依家10點15分,恒指跌幅稍為收窄,至跌584點,報26981點。再睇返部咗幾日嘅友邦(01299),今日梗係隨市跌啦,100天線($79.324)終告失守,兼且呢個裂口殺咗落去6月19日個上升裂口位($77.4至$78.9),連續第五日跌穿保歷加通道底($79.374),都話SlowSTC(14,3)就算落到10幾呢啲嚴重超賣位,但就係仲有嗰10幾可以跌;小心9MOM落到-8呢啲位後有橫行嘅跡象,真係好係一個見底嘅樣,但在於穩陣起見,就連避險股港鐵(00066)同領展(00823)「齊上齊落」,博反彈呢家嘢都係遲吓先啦。

但係有一樣嘢係唔遲得架,就係:小妹好沉重地向大家宣布,下個星期一(8月5日)【輪證贏家】同【輪證下半Part】將會暫停一日,而我本人亦唔會喺公司出現,感謝大家。香港人加油!

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

#輪證贏家 #輪證下半Part #warrantsandcbbc

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads