本想打算將隻恒指Call(27447)放走就算,但恒指成個下晝都好似無乜反應,所以一早就估恒指可能想儲貨,再睇吓邊邊肥就殺邊邊;直至臨收市前個5分鐘唔知做乜無啦啦爆咗上去,拉到全日收市只係跌20點。基於點數上實在太無反應,連5分鐘圖都已經懶得(應該係唔記得,甚至係無意識)去開,原來喺噚日下晝3點10分到,恒指5分鐘圖SlowSTC(14,3)係上過「8」字頭以上嘅超買位,但可惜嗰段時間恒指點數都係無反應呢。
今朝早起身睇新聞,見話噚晚美股造好,右下角見報日經都係升緊,心諗恒指應該今日會有好少少嘅表現掛,9點20分做完U盤,恒指開市報28891點,升36點。去到9點50分,見恒指5分鐘圖SlowSTC(14,3)隨今朝開市後走多幾步,終於接近到頂位時,見(27447)高低位$0.087/$0.081,平均價就係$0.084,按早兩日計過嘅平均買入價$0.0855計,都仲要輸多格半;就算我當你好叻,喺高位$0.087走人,賺幅都只得1.75%,夠你買個麵包都唔夠你飽啦。
咁啱呢個時候,今朝收到下半年所有大假成功批核嘅戰友Jack係whstapp留言:「期指升穿29,000點啦喎。」過多兩分鐘,恒指現貨都上到29000點啦,依家10點28分,出完一個恒指見近兩個月高位+四隻藍籌創新高嘅push之後,睇返恒指日線圖見今日高位暫時係29007點,換言之28900至28999點嗰279張期指嘅街貨全數死亡,而噚日講嘅重貨29000至29099點就變成最貼價嘅熊證街貨區,而貨量有相當於987張期指。
至於下方牛證,最貼價仍然係28500至28599點,呢度有相當於715張期指,唔算係重貨區,呢part只係最多新增啫;重貨區要數到落到27700至27799點,呢度有相當於1067張期指,呢堆牛證都應該放咗一段日子架啦,「咁點解唔換一隻貼價啲、槓桿高啲嘅牛證呢?」咁有兩個可能嘅:一係懶;二係無諗過要咁做囉。但係喺28300至28399點呢度都有982張期指,屬於第二重貨區,雖然證明唔到有人會換貼價牛去追升,但至於可以話到比你知,個市真係儲夠重貨呀。
依家10點45分,恒指做緊28905點,比頭先升穿29000點嗰一下又回返成百點咁滯。用牛熊各最貼價嗰層(牛證:28500至28599點;熊證29000至29099點)門口位(牛證28599點;熊證29000點)拉個中位數(28599+29000)/2=28799.5點。即係話現價都仲係同上方熊證比較近。
再者,日線圖上見10天線(28574點)已經逐步走向100天線(28614點),20天線(27981點)喺下方亦跟隨10天線上揚,且暫不理6月19日個上升裂口,一條「上升道通」已經確立出現,仲要依家個位近「上升通道」底部,好似前途好一片光明咁喎。
作者阿珊,任財經/投資版傳媒人十幾年,《鐘擺戰策贏港股》作者。用技術分析專心玩輪證,唔貪心,志在搵餐下午茶。
電郵:[email protected];Weibo[下半part]:#Gladyshan#