中美貿易關係緩和，雖然達成協議之路仍漫長，但至少兩國重啟談判，打破之前僵局，確係令市場放下心頭大石。加上侵侵肯放華為一馬，令科技股呢兩日表現特別標青。美股隔晚三大指數繼續上升，可惜港股今日未能跟隨。由於內地上月服務業PMI跌至4個月低位，中港股市亦受壓。
恒指低開93點，開市未幾已跌154點，見過半日低位28721點，其後拗腰倒升，見過半日高位28891點，可惜上升動力不足，再次跌逾百點，其後跌幅收窄。恒指中午報收28823點，跌52點；國指中午報收10911點，跌69點。
大部份重磅股藍籌股跟隨大市回吐，不過友邦(01299)、港鐵(01299)及蒙牛(02319)創上市新高，半日分別升0.3%、0.5%及4.6%，呢三隻藍籌阿Man一向睇好，內地保險市場發展潛力龐大，友邦能打入內地市場，錢途實無可限量。至於地鐵更加唔使講，營運香港全城交通命脈，兼具地產概念，本來就係攻守兼備嘅好股。至於蒙牛為內需股中乳業股龍頭，即使貿易戰仍未完全解決，內需股亦唔受影響。至於勝訊則回落1%，平保(02318)、建行(00939)及工行(01398)均隨大市回軟。
美國十年債息回落，地產股、收租股及REITS全部逆市做好，陀地地產股全線上升，而領展(00823)則升2.1%。不過地產股始終受息率走勢影響，阿Man一向偏好物管股，經過稍稍調整後，今早再重拾動力，多隻物管股全線回勇，當中阿Man最早發掘嘅中海物業(02669)半日急彈6.3%，其他物管股升幅由2%至5%不等。
今日市場另一焦點係半新股中煙香港(06055)，股價一升再升，半日曾再狂升逾四成，見過28.5元，不過升勢過急難免回吐，半日升幅收窄至5.7%，證明物極必反，小心提防倒跌嘔突。仍有貨喺手，留意收市前要守住19元，此位不守要先獲利離場。
雖然G20峰會後算係有好消息，但暫時大市上升動力明顯不足，恒指於二萬九水平前有阻力，短線恒指支持位為10日線(28500點)，好淡分水嶺喺28800點，若然支持失守，或進一報下試50日報(28275點)。
麥狄文
(徐狄怡‧證監會持牌人 滙盈資產管理‧董事總經理)
