等到頸都長嘅G20峰會終於展開,不過戲肉係明早嘅特習會,市場氣氛傾向觀望,而長周末前有缸邊友先選擇離場,周末情懷下港股有少少沽壓。恒指今早高開11點,報28632點為半日高位,但開市無耐即倒跌,100日線(28577點)得而復失,半日最多跌202點,見過半日低位28419點。恒指半日報收28460點,跌161點;國指報收10849點,跌48點。
重磅股個別發展,但都係跌多升少,友邦(01299)點0.7%、騰訊(00700)跌0.8%,大笨象(00005)跌0.5%,港交所(00388)亦跌1.1%。產油國仍未決定減產與否,三桶油今日見沽壓,半日跌1.1%至1.5%不等。其他重磅股均見回吐。
人民幣近日表現較穩,內房股續有追捧,唔少內房股今日均見上升,反而物管股有回吐,不過都係嗰句,阿Man都係寧取物管股。而內需股當中今日體品股跑出,一對龍頭李寧(02331)跟安踏(02020)分別升2%及0.5%,其他體品股均逆市做好。
至於阿Man喺其他平台推介過嘅中國聯塑(02128),今日得大摩出報告加持,給予「增持」評級,半日急升近6%,升勢有餘未盡。有跟上車嘅,可繼續坐穩,唔使急於落車。
呢期資金追捧半新股,而今日更有6隻新股同時上市,表現各異,當中表現最勁係勛龍(01930),半日較招股價升37.5%。而途屹控股(01701)出師不利,半日較招股價低36.5%,剛好與勛龍走勢相反。
其他股份乏善可陳,今日下半場估計都係悶局一場,市場關心嘅係明早特習會結果,若然雙方能握手言和,齊齊發表聯合聲明,估計大市踏入七月或有個好嘅開局,指數仍有機會向二萬九挑戰。相反中美關係不進則退,關稅僵局持續,大市或先下試10日線(28194點),留意20日線(27672點)及250日線(27610點)開始交匯,呢個會係決定後事好壞嘅關鍵支持位。
麥狄文
(徐狄怡‧證監會持牌人 滙盈資產管理‧董事總經理)