|
熱門:

2019年6月26日 即巿股評 港股直擊

【輪證贏家】恒指彈出又彈入

依家9點26分,我已經返到公司坐定定喺度,事關稍後時間我要去金鐘上個雞精班,係呀,咪就係關於嚟緊會出嗰隻界內證囉,唔識咪上堂學嘢囉,你估我真係一出世就乜都識架咩!

呢個鐘數恒指做完U盤,開市報28046點,跌139點,噚日都有講過,如果投資者考慮順勢出熊/Put作部署嘅話,可先以上星期三(6月19日)個上升裂口頂部(28022點)作為首站目標。依家日線圖上見恒指同呢個位相距不遠,基本上手揸熊/Put嘅人已經可以喺開市時開餐。

依家9點31分,港股正式開市,恒指開市後繼續下行,依家跌緊167點,做緊28018點,換言之恒指依家已經進入咗嗰上星期三個裂口範圍(27584至28022點),呢個裂口補唔補?都幾大程度決定於有幾多街貨被個市打靶,你知啦,今日都26號,聽日就期結啦,後日就G20啦,一係佢哋就收夠數,吽住過呢幾日就算;一係就嗱嗱聲補返個裂口,殺得幾多貨得幾多貨。

開恒指牛熊證街貨圖,上方最貼價熊證為28600至28699點,呢度噚日新增605張期指,儲到呢度變成熊證重貨區,有相當於1096張期指,至於下方牛證仍然都係27700至27799點,新增貨量都唔弱架,有557張期指,儲到呢個位又係重貨區,有2097張期指。

依家9點39分,恒指跌幅大為收窄至91點,做緊28094點,日線圖睇似乎下方條10天線(27918點)暫時見有支持作宿,而再落啲嘅20天線(27531點)同250天線(27618點)個疑似「黃金交叉」就繼續作勢中。用呢口現價計,上方熊證同現價相差506點;至於下方牛證就只係相差250點。咁樣衡量之下,似乎下行殺重牛嘅機會好高。

依家9點50分,恒指跌幅收窄到近乎無升跌咁滯,稍後會唔會倒升好難講,用返噚日計過嘅牛熊街貨中間數(28600+27799)/2=28199.5點,愈近呢個位就愈怕佢一個唔該唔知彈去邊,事關開埋恒指波幅指數(VHSI)睇嘅話,見到VHSI慢慢回升中。老老實實,恒指喺呢個位附近彈出彈入都唔知幾多次。

若然想安全試水溫嘅話,小注開恒指Put(16258),行使價27668點,槓桿同引伸都適中,貪嘅就係輪無打靶機制;咁界內證又有咩機制?呢隻嘢7月中就會出,大家都估初期唔會有好多隻上市,始終新產品要時間去適應同認識,有啲令人諗起當年出牛熊證時,市場上100隻證都無,我個時負責砌輪證表都不知幾輕鬆,但之後就愈嚟愈多。

界內證唔係啲咩新發明,喺外國一早已經有,只係香港今年先至有咁解,但都係嗰句:唔識就要學。上完堂返嚟嘅[下半part]我嘗試「背默」一次(而我唔知大家有無興趣去知,無嘅話一早email定話我知),[下半part]今日可能會遲少少,請見諒。

作者阿珊,從事財經及投資版報道逾10年,由平面媒體走到網絡世界,《鐘擺戰策贏港股》作者。相信技術分析,專玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。