隔晚美股做好,標指更再創收市紀錄新高,侵侵又第一時間衝出嚟認叻,慌死人唔知,又喺Twitter帖文。無可否認,美股再回勇,呢期確係靠侵侵背後發功,除咗佢打咗個電話畀習大大,令市場重燃貿易戰達成協議嘅希望之外,仲威脅要燉聯儲局鮑爺嘅冬菇,令聯儲局本月議息發表嘅聲明,繼續充滿鴿意,市場更有憧憬美國最快於7月減息,而今年下半年減息幅度高達半厘。
至於港股喺短短三個交易日升逾千點,恒指升破250日線(27639),接著果然係挑戰50日線(約28479點)及100日線(28520點),目前兩線開始交匯,不過升至此交匯處則遇阻力,今日恒指高開後反覆偏軟。恒指開市報28581點,已經係半日高位,其後窄幅上落,最低見過28433點,跌逾百點。中午恒指報收28476點,跌73點;國指中午微升2點,報10925點。
重磅藍籌股個別發展,騰訊(00700)高開低走,半日報收351.4元,半日跌0.7%;大笨象(00005)跌0.8%;港交所(00388)則跌0.7%。平保(02318)則無起跌,友邦(01299)跟建行(00939)則微升0.1%。跌得最傷係剛發盈警嘅中電(00002),大行亦唱淡,股價半日跌4.5%,為半日表現最差藍籌。
金價及油價急升,相關股份繼續做好,阿Man噚日提過黃金股及相關ETF值得留意,今日相關股份繼續做好。雖然三桶油亦延續升勢,只係阿Man仍然堅持,寧信黃金價格升勢可持續,亦唔好輕易相信有波幅,無升幅嘅油價。
其實阿Man對港股前景一向唔係太悲觀,雖然貿易戰仍未解決,但中美兩國元首將於下周G20會晤,即使談判未能一時三刻達成協議,總算成功打破僵局。隨住侵侵開始要應付嚟緊嘅總統大選,估計展開競選工程嘅同時,呢一場已歷逾一年嘅貿易戰,今年內或有個了斷。至於歐美央行已準備好為下行嘅經濟作好準備,已為減息打開方便之門。只係由G20至貿易戰結束,中美能完滿達成協議,將會係一段漫長道路,港股能否如美股般一帆風順,暫時仍充滿不定性。至怕係貿易戰結束後,或迎來環球貨幣戰,現階段未係大手入市嘅時候,要押注喺G20峰會都係保守少少穩陣。
麥狄文
(徐狄怡‧證監會持牌人 滙盈資產管理‧董事總經理)