|
熱門:

2019年6月19日 即巿股評 港股直擊

【盤房來料】變數仍存 且戰且走

又係Twitter,侵侵嘅Twitter帖文再一次發揮威力,佢話同習大大講咗個電話,仲已約好下星期喺G20峰會見面,「特習會」令市場重燃中美貿易談判達成協議嘅希望。另一方面,侵侵又曲線向聯儲局施壓,藉此可盡早落實減息。兩大因素利好帶動美股再顯著上升,更推動港股今早大幅反彈,不僅成功升越250日線(27658點),更收復二萬八大關。

恒指高開726點,報28224點,不過始終裂口上升惹嚟部份投資者高位獲利,大市升幅收窄至523點,升幅收窄至523點,低見28022點,但仍守住二萬八關,而在接近二萬關口,再見買盤收集,支持恒指再擴大升幅至逾600點,目前喺28100水平穿梭,中午恒指報收28150點,升651點;國指則報收10756點,升248點。半日成交有所回升至639.95億元,幾乎已及早幾日不足七百億嘅全日成交額。

五大重磅藍籌股全力推高大市,騰訊(00700)半日升3.6%,報346.2元,終能突破近日阻力340元,家下呢個阻力因變為支持,留意想參與炒作勝訊嘅缸邊友,可以用番呢個位嚟做炒作止蝕。而友邦(01299)、平保(02318)、建行(00939)及大笨象(00005)分別升3.7%、3.6%、2%及1.7%,五股合共佔去半日過半升幅。

至於之前最受貿易戰影響嘅手機設備股,喺貿易戰問題有望解決希望重燃下,全部再獲資金追捧。舜宇(02382)勁升8%,其他手設股閒閒地升半成以上。舜宇一向係手設股中阿Man最睇好嘅,如今舜宇亦有機會翻身,暫時80元有些少阻力,不過只要市況能扭轉之前嘅劣勢,舜宇股價仍有機會向住85元進發。除咗手設股之外,券商股亦係另一個受追捧板塊,當中升勢最勁嘅係華泰證券(06886),亦係阿Man一直認為板塊中較有份量嘅領頭羊。

至於對人民幣較敏感嘅航空股,今日亦反彈,不過同樣受惠人民幣貶值壓力紓緩嘅內房股亦見利好,只係今日唔少股份都見高位後回落,技術走勢上都出咗枝陰燭,完全唔講得上係好走勢,要追貨入場都係小心為上。

總括嚟講侵侵為人係點,大家心照不宣,反覆無常嘅佢,特習會前後有冇搞作真係有水晶球都未必知。總之一日未落實簽署協議,變數仍存,呢啲時勢只能且戰且走,步步為營。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。