熱門:

2019年6月19日 即巿股評 港股直擊

【輪證贏家】牛證執到嘅做啲善事好嗎?

噚日喺[下半part]再推牛證,為嘅就係恒指上破咗個「三角形」,咁明顯嘅破位係好事,不過因同時見到頭頂有機會出「死亡交叉」,所以揀隻收回價26808點嘅恒指牛(69983)出嚟,又未至於好遠嘅(用噚日個市況嚟睇呀),安全啲好嘛。等到下半場臨收市前半個鐘到,先等到恒指5分鐘圖SlowSTC(14,3)落到超賣位,按3點35分至收市呢段時間(69983)高低位做過$0.064/$0.062計,平均買入價就係$0.063。

正當有啲擔心隻牛證嘅時候(說實話真係唔係咁鍾意過夜坐貨),誰不知噚日喺屋企做緊低頭族時收到台嘅message:美國總統特朗普與國家主席習近平電話交談,憧憬G20會議期間雙方會面,美股道指升逾300點。9秒9應機之後再出埋個push,咁就可以安安落落咁去刷牙再上床抖,道指都升到咁囉,心諗第二日恒指仲唔借機抽上去?手執牛證嘅又點會唔瞓得冧?(如果成件事相反就大獲,咁我諗你哋都明白點解我咁怕、甚至係憎過夜坐貨啦)

今朝恒指開市升726點,報28224點;依家9點53分,升幅收窄至560點,做緊28059點,(69983)賺幾多?唔駛計啦,總之呢啲鐘數見好即收就得啦。

依家10點正,恒指升幅比今朝開市少咗,所以日線圖上呈一粒實心嘅陽燭。呢一下子爆升除咗彈返上條250天線(27658點)之外,誓估唔到噚日講嘅「一步到位」就真係到咗,但係大市同時彈穿埋條保歷加通道頂(27927點),即使依家保歷加通道口拓闊,但係最終結果只有兩個:1. 保歷加通道口拓闊嘅幅度同速度要快過個市嘅升幅,咁條保歷加通道先至可以包得住恒指依家嘅升勢;2. 個市一彈即散無下文,咁粒燭先至可跌返落去條保歷加通道裡面。

如果按恒指牛熊證街貨圖睇,照常理諗,應該會有唔少資金趁大市急彈嘅時候入貼價熊,博呢個只係彈散市;換言之依家見到熊證最貼價嘅28200至28299點熊證,嗰324張期指應該有一部份收隊(因為真係太貼,按依家10點6分恒指最高做過28224點計,呢一層根本就係中流彈),估計就算資金博大市掉頭都會揀28300至28399點,或者28400至28499點,呢兩層暫時分別有334同418張期指,唔好睇少嗰418張期指呀,咁睇已經係重貨啦。

至於下方牛證最貼價係27200至27299點,同現價有逾800點差距,不過又真係有啲奇怪,何解咁少街貨嘅?唔通噚日無乜人買個市升?Oh, Really?不過真心唔好依家走嚟追,以依家恒指個市況睇,高開低收兼穿保歷加頂,你想個市點行?過咗朝早呢一浸先至再算吧!

喺呢個位想講兩句題外話:相信大家都知道呢排香港社會氣氛好差好差,大家係咩政治立場/背景都好,如果今日真係因為個市大幅抽升而賺到一筆嘅話(說實話隻(69983)喺依家9點58分有八成幾嘅升幅,一開市就殺六層熊證,係呀,又係「六條行車線」咁殺出嚟呀,不過今次同上次唔同,上次係要慢慢殺,今次一嚟就殺),希望大家可以喺呢筆賺幅當中攞少少/你覺得合理嘅錢出嚟做捐款,至於捐去邊就大家隨心啦,只係想大家賺錢嘅同時都可以幫吓身邊嘅人,又或者當發財立品囉;講錯嘅你就當我無講過啦!

作者阿珊,從事財經及投資版報道逾10年,由平面媒體走到網絡世界,《鐘擺戰策贏港股》作者。相信技術分析,專玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads