熱門:

2019年6月18日 即巿股評 港股直擊

【盤房來料】大市上落資金流入炒新股

市場憧憬聯儲局今次嘅議息會議,將會為最快7月份減息鋪路放鴿,隔晚美股表現平穩。至於港股呢邊,有消息傳出特首或於今午舉行記者會,甚至更有傳聞有人辭職,缸邊友憧憬政治爭拗有望降溫,加上內地股市向好,港股早段走低後回升2,半日升200點,成功收復20日線(27258點)。

恒指今早高開62點,報27289點,早段一度倒跌26點,低見27201點,但內地股市向好,港股隨其回升,最多升255點,見27482點半日高位。中午報收27427點,升200點;國指中午報收10487點,升58點。

重磅股表現以中國旺旺(00151)升2.9%係表現最好嘅藍籌股,而兩隻藍籌醫藥股亦升逾2%,阿Man一直都話喺貿易戰陰霾下,醫藥股可望跑贏,係逢回吐低吸嘅股份。其他重磅股都有唔錯表現,友邦(01299)跟騰訊(00700)升齊1.4%,合共為恒指貢獻77點。阿里巴巴如能今年內嚟香港第二上市,將會打破集資紀錄,資金繼續追捧港交所(00388),有冇本事重上之前高位,即係280元水平,要睇市況配唔配合。

東方教育貨源盡入強中手

個市暫時都係炒住上落先,預計短線彈到上250日線(27669)會有阻力,而喺10日線(27236)有短線支持。至於個股方面,呢期有資金流入炒新股,隻中煙香港(06055)抖咗兩日又嚟過,半日已升14%,睇吓有冇本事上番早兩日高位9元樓上。另一隻阿Man留意嘅新股係中國東方教育(00667),公司係職業技能教育的龍頭企業,噚日升完,今日上半場有啲回吐。當然以成交計,東方教育拍馬追唔上中煙香港,估計係東方教育嘅街貨都幾乾。睇番公司上市獲基金界名牌入股,包括高瓴、挪威央行、大摩資管、Blackrock,肯定係大戶睇好其前景,不過呢啲機構投資者入咗場就坐定定,所以暫時成交係冇咁熱鬧。

公司招股時,IPO只有七成散客認購,市仲跌穿咗招股價11.25元,皆因之前有投資者擔心家下公司嘅業務,仍未達到今年公司預測嘅80%盈利增長,不過仲有半年,呢個問題唔使過份憂慮。其實公司業務增長強勁,加上過去兩年新增66所學校會在2019年開始轉虧為盈,原有學校招生強勁,上半年盈利已經達到公司預期,招生旺季大部份在下半年,學費提早一年收款,公司有信心達到盈利目標。而且公司招股期間,又面對貿易戰惡化等負面消息,拆息高企令市況麻麻,都冇乜人關心個市,招股反應較為冷淡。不過正因為咁,貨源已盡入強中手,值得留意。 公司嘅增長跟中教控股(00839)同A股中公教育不分高下,但東方教育現價係三股中最低,升值潛力自然最大。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads