|
熱門:

2019年6月13日 即巿股評 港股直擊

【輪證贏家】香港同大市一樣:陰燭

噚日雖然無做到任何推介,但喺[下半part]度講咗大市下行嘅機會確係比較高,主要原因係用當時嘅恒指數點同牛熊證兩邊差距計,係比較近下方牛證;同埋即使恒指噚日下跌,但估計資金會以貼價牛作博反彈,所以就算重貨區向下移,但下方牛證街貨量應該仍會多過上方熊證。結果今日做完U盤後開市報27217點,仲未有咩事發生嘅;到搭正9點半之後就嚟料啦,穿完27100點都算,依家10點7分,26900點都穿埋。

噚日入咗熊證/Put過咗夜嘅,呢啲時候就應該要收割,即使再追大市向下,都可以先收割呢一轉,之後再追隻更貼價嘅輪/證好過。記住,輪證嘅條款係不變,變嘅係個市,所以當市況唔同咗,你就要用唔同嘅輪證去應付個市;人哋用唔同武器去對付我哋,我哋就應該用返唔同嘅方法去抵抗,那怕只係一張保鮮紙,都可以有唔同function。

睇返恒指日線圖,今日又整多支大陰燭,殺三層牛證、穿咗條10天線(27107點)、補埋星期一(6月10日)嘅上升裂口(26984至27155點)。換條保歷加通道出嚟,見到依家恒指落返去保歷加下降通道,通道底位置係26536點。殺落呢個位真係唔奇,一來你見26600至26699點呢度已經見重貨區;二來,都係嗰句,恒指大插過往依家同下方牛證較近,除非又有一堆新出嘅貼價熊出場,否則都係下行嘅機會較高;再者,兩支大陰燭出現,你估有無資金出嚟博反彈?如是者下方牛證嘅街貨量又將會變成點?恒指熊(63579),收回價27900點,同現價距離有成千點(太近會中彈的),19倍槓桿唔輸蝕,等5分鐘圖見超買時落場。

小妹聽日有事不在公司,所以聽日[輪證贏家]同埋[下半part]都會暫停一日,下個星期一(17日)先至會再蒲頭。喺呢度想預先恭喜將於星期日(16日)做老襯嘅信報分析員強強(係呀!逢星期三上FB Live個件文青呀),老土都要講句:祝你同你太太白頭到老,永遠恩愛。(記得我哋同Arthur Nam個雞煲之約)

BTW,坐喺公司望出窗,都唔關落雨事,真心覺得香港同今日支大陰燭無分別。

天祐香港。

作者阿珊,從事財經及投資版報道逾10年,由平面媒體走到網絡世界,《鐘擺戰策贏港股》作者。相信技術分析,專玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。