熱門:

2019年6月10日 即巿股評 港股直擊

【輪證贏家】恒指衝破熊證四條行車線

上個星期四(6月6日)無做過任何動作,只係乖乖地做好晒啲嘢,迎接連同端午節嘅三日假期。今朝早見日經彈逾200點,恒指今朝開市都唔弱,同日經齊齊跟返上個星期五(7日)美股嘅升勢,甫開市升241點,重上27000點;依家9點43分,恒指升幅略為擴大,至升293點,27258點。

上到272XX點呢啲位就梗係將第一層嘅熊證271000至27199點殺死咗啦,依家變相27200至27299點嘅熊證喺恒指牛熊證街貨圖上嚟講先至係第一層,而呢度有相當於773張期指。同同事Patrick講兩句嘢,兼睇埋台send出嚟嘅WhatsApp話林鄭1100開live之後,再望返電視機已見恒指升逾400點,做緊27386點,27200至27299點宣告全數死亡,最貼價熊證再向上移至27300至27399點,呢度有相當於1496張期指;再幫另一個同事阿Jo上FB Post之後,恒指繼續前進,連27400點都穿埋,依家10點6分,恒指升逾500點,做緊27470點,恒指呢度向上衝嗰度力,同噚日遊行人士衝開警方防線,佔據六條行車路真係有得fight!唔駛問,依家見27400至27499點嗰1008張期指都應該凍過水,以暫時恒指最高做過27490點計,根本得返10點喺度吊鹽水。

日線圖見恒指已經突破咗五月時所做出嚟嘅跌勢,今日一粒大陽燭一彈就彈上20天線/保歷加通道中軸(27492點)樓下。收復10天線(27091點)當然膠興,下方SlowSTC(14,3)都明顯由低位抽升;但以保歷加通道嚟睇,恒指現水平仍處於保歷加下降通道裏面,同時DMI嘅ADX見明顯下行,即使依家10點17分見恒指進一步升穿27500點樓上,一口氣食咗4層熊證街貨,但係呢一彈會唔會純粹跟星期五外圍升番仲要借勢升多啲,之後會收檔?定還是恒指一口氣衝破熊證「四條行車線」之後,抖一抖,過兩日再嚟過?

恒指牛(66909),收回價26908點,同現價有逾500點差距,槓桿比率約50倍兼成交活躍,目標只係27600至27699點嗰927張期指;如果今日達標,咁恒指就變相用一日時間衝破咗熊證「六條行車線」架啦!

作者阿珊,從事財經及投資版報道逾10年,由平面媒體走到網絡世界,《鐘擺戰策贏港股》作者。相信技術分析,專玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。