|
熱門:

2019年6月5日 即巿股評 港股直擊

【盤房來料】港股仍未擺脫彈完再散格局

隔晚聯儲局鮑爺突然放鴿,表示會密切監視美國經濟情況,並以適當措施對應,市場解讀為聯儲局好快減息,最快會喺呢個月嘅議息會議減第一次,美股隔晚即贈興,三大指數狂升逾2%。除咗減息預期之外,中國商務部周二表示,要繼續談判解決雙方貿易衝突。而侵侵跟珊珊喺米字旗國會面後,話已向米字旗國企業領袖承諾將有一個非常重要嘅貿易協議,貿易戰稍為緩和,市場即興奮慶祝。

不過對於侵侵嘅所謂承諾,真係信佢一成,都畀人詐形,佢出咗名反口覆言,缸邊友你認真便輸了…..至於話聯儲局最快喺今個月減息,更加係無乜可能,事關暫時美國嘅經濟數據未至於差到要即時減息,若然真係差到要咁快減息,經濟肯定好大鑊。所以阿Man認為美股呢吓反彈,唔值得興奮,反而好好諗下之後嘅日子,會唔會好似某啲專家咁講,比2008年嘅金融海嘯更加大鑊。

睇番港股呢邊,仍然未擺脫一彈又散嘅弱勢格局,恒指高開354點後,最多升357點,見過27119點半日高位。不過貼住條10日線(27116點)又遇阻力,升幅顯著收窄至114點,見過26875點半日低位。恒指中午報收26953點,升192點;國指升37點,報10378點。

藍籌股普遍反彈,友邦(01299)半日升2.4%,已為升幅貢獻接近三分一,騰訊(00700)升1.4%,不過20日線及250日線,大約喺342至345元阻力唔細,暫時唔係咁易突破。其他重磅股都係咁上下,舜宇(02382)半日彈3.5%,係表現最好藍籌股。

醫藥股噚日啱啱受內地財政部查數件事捱沽,今日又話國辦印發深化醫藥衛生體制改革重點工作任務,令醫藥股繼續捱沽。今日醫藥股跌幅閒閒地3%以上,中生製藥(01177)更跌逾6%,成分股中包第尾,股價跌近100日線,即係大約7元應該有支持。阿Man對於醫藥股嘅睇法無改變,行業改革只會汰弱留強,令整個行業有更好發展,捱過陣痛後,優質嘅龍頭仍可以留低,調整可能係收集嘅機會。

至於5G概念股繼續有炒作,市場憧憬內地5G牌照好快出台,資金繼續湧入相關股份,中國鐵塔(00788)又上番兩蚊,半日升逾半成。中興通訊(00763)跟京信通信(02342)分別升5.9%及4.9%。喺買大唔買細嘅原則之下,呢個板塊首選仍然係中國鐵塔同中興通訊。

不得不提阿Man之前提介過嘅澳優(01717),今日創新高,半日升5.7%,半日收15.82元,暫時已進入無人之境,有貨就梗係坐定定,無貨想追就要諗諗,始終去到17元左右,就已經30倍PE,呢啲價已拍得住蒙牛(02319)。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。