噚日喺weibo無upload到下半part,事關由朝早到下晝到依家,weibo都係咁彈:「你的微博發布成功。目前伺服器數據同步可能會有延時,所以麻煩耐心等待,非常感謝。哼,真係唔該晒;但有個別讀者email問我[下半part]在哪,我真係有寫到架,如果唔係又點可以火速覆你哋兼send埋條稿比你哋呢。
今朝鬧鐘未響,我家老爺就起身閂窗,家住將軍澳嘅我今朝見到出面確係雨勢強大,就連窗出面條隧道都睇唔到,諗住帶定對波鞋、着住對拖鞋、摺起埋個褲腳出面口,返到公司再換就無事啦,誰不知出門口之後個天無乜點落雨,只係行雷;出埋隧道落到九龍灣之後,仲出埋太陽添。我喺巴士望住我對腳,嗰一刻真心覺得自己好蠢。
不過有樣嘢唔蠢,就係噚日成功入到恒指熊(65576),今日就真係禾味啦。噚日朝早11點50至55分、下半場1點20至25分,同埋1點50分至55分,呢三個時段都見到5分鐘圖上嘅SlowSTC(14,3)上到超買位,唔拆得咁細去計價啦,就由朝早11點50分至下晝1點55分呢段時間,以(65576)高低位$0.069/$0.058嚟計,平均買入價就係$0.0635。依家10點22分,恒指跌115點,做緊26778點,而(65576)依家就做緊$0.067,用現價計嘅話賺幅都有5.5%;當然如果你攞到最盡喺今朝早10點15分,見恒指5分鐘圖SlowSTC(14,3)落到超賣位時將(65576)放走嘅話,咁就梗係唔止賺咁少啦。
開恒指牛熊證街貨圖,下方牛證最貼價落到26700至26799點,呢度有相當於523張期指,但按截至10點31分止,恒指暫時最低做過26736點,即係話呢一層貼價牛其實仲有36點未死去啫,同樣地你都可以當佢死晒。再落嘅26600至26699點,呢度有相當於653張期指,唔算好多,但勝在夠近。至於重貨位嘅話,比多100點就到,即係26500至26599點,呢度有774張期指。
「吓?774張期指都叫做重貨?」係呀,咁跌法仲有幾多心口有個「勇」字嘅清兵買牛博反彈?你睇上面堆熊證,人哋重貨區27300至27399點有1406張期指就知咩事啦,依家10點36分,個市似乎做緊一個新低位出嚟,唔緊要,反正現價同下方牛證嘅距離點都近過上方熊證,熊證最貼價個範圍係27100至27199點,現價要反彈5XX點先至可以上到個門口。剛剛見恒指連26700點都無埋,(65576)今日應該都有大把時間、大把靚位可以比你慢慢走。
「仲可唔可以再追跌呀?」承如上文所講,上方熊證愈嚟愈重,下方牛證就愈嚟愈輕,上重下輕嘅情況出現嘅話,其實恒指即使再落都無貨可以比佢殺,咁就開始有機會出現跌停> 引錢入牛儲肥> 然後先再向下殺;又或者當上方熊證愈出愈貼價嘅時間,儲牛都廢鬼事,一個唔該反手向上殺仲爽快。咁到底個市會採取邊種方式?唔知道,但肯定嘅係繼續用以快打慢嘅方法做去trade比較安全。
BTW,我決定將[下半part]同時放埋喺由小妹負責執頭執尾嘅website同app上面,「即係邊個?」PM我,話你知(我唔可以喺人哋地頭「賣廣告」架嘛)
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo[下半part]:#Gladyshan#