熱門:

2019年5月30日 即巿股評 港股直擊

【盤房來料】現金為王防守股亦回吐

美國國債孳息倒掛情況繼續惡化,加上內地官媒發表文章,警告中國呢鋪嚟真,隨時會用限制出口稀土美國作反制措施,市場憂慮貿易戰升級,中美關係持續惡化,最終將拖累美國經濟衰退,甚至全球經濟衰退,市場預期美國聯儲局明年1月加息機會高達九成。

隔晚美股三大指數下跌,道指盤中更曾跌逾400點,但恒指今朝卻高開83點,見27319點,但已經係半日高位,其後大市掉頭向下,最多跌214點,低見27020點,創自1月24日以嚟新低,其後跌幅收窄。恒指中午報收27121點,跌114點;國指升49點,報收10440點。

恒指暫時險守二萬七關,主要係內銀股跟內險股逆市做好撐住,同時亦推高國指跑贏大市。人行連續多日放水進行逆回購,連續向市場淨投放累積達4000億元人仔,主要係包商銀行事件發生後,阿爺一定要穩住市場,穩住人民幣,同穩住信心。四大行全部逆市升,內險股亦向上,推動國指逆市走強。

除咗內銀及內險股發力,騰訊(00700)呢架火車頭亦升0.3%撐住大市,不過另一重磅股友邦(01299)半日跌1.7%,拖低,恒指47點。港交所(00388)半日亦跌1.4%,話咗就算阿里巴巴下半嚟港股第二上市,又或者係其他喺美國上市嘅中概股亦嚟港股上市,都唔係一時三刻嘅事,遠水不能救近火,近日港股成交愈玩愈縮,港交所嘅升勢或者只可以曇花一現。

至於手機設備股話咗有波幅,唔會有升幅,稍有風吹草動就有藉口被沽售,何必博嗰一日半日反彈。今日手機設備股又掉頭向下,皆因有報道指三星摺疊手機喺6月份無法發貨,整個板塊受影響全線下跌。而華為事件亦將導致手設股出貨量跌,手機設備股又好得去邊。

唔知大家記唔記得,阿Man講過防守股係大市最後一根蘆葦草,今日防守股跟大市一齊回吐,已經響起警號。撞到正今日期指結算,大市就靠內銀內險撐住個市,守住二萬七水平,小心資金有意全面逃離港股,結算之後迎來六絕月,屆時大市跌勢更為全面,目前市況係現金為王,整個投資組合建議現金量係八成,留低兩成持有防守股已經係極限。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads