熱門:

2019年5月28日 即巿股評 港股直擊

【盤房來料】港股短線超賣大市反彈

MSCI首階段擴容A股正式生效,A股納入因子將升至一成,而富時羅素亦已公布納內全球股票指數系列嘅A股名單,有關變動喺下月21日生效,同樣納入過程分三階段進行,完成後預期可為A股帶嚟100億美元增量資金,點都對短期氣氛有幫助,並為A股帶嚟穩定作用。加上有消息指阿里巴巴下半年嚟香港第二上市,集資額達200億美元,為港股沖喜沖喜。

恒指低開13點,早段曾跌58點,見過半日低位27230點,其後大市拗腰,半日最多升155點,見27443點,中午報收27422點,升134點;國指則升55點,報收10458點。不過大市成交仍然歪豬豬,半日得404億元。

騰訊(00700)連跌八日後反彈,中午報收329元,升1.6%,半日貢獻42點升幅,其他重磅股個別發展,平保(02318)升1.2%;建行(00939)半日升0.5%。另一重磅股友邦(01299)亦升0.4%。阿Man愛股中生製藥(01177)升3.7%,重上8元水平,半日報收8.12元;石藥(01093)半日升1.4%。除咗醫藥股之外,之前跌到一仆一碌嘅手機設備股亦反彈。

內地有報道,廣東省委辦公廳、廣東省政府辦公廳推出完善促進消費體制機制實施方案,提出針對9個方面嘅29條措施,穩定及改善消費預期。措施尤其針對汽車消費優化升級,方案包括逐步放寬廣州、深圳市汽車搖號及競拍指標,擴大准買規模,其他地區域市不得再出台汽車限購規定。刺激內地汽車消費措施,汽車股全面炒上,吉利汽車(00175)半日升逾6%,成為表現最佳藍籌股。其他汽車股升幅由超過4%至接近7%不等。

由於今日唔少股份反彈,但唔代表市場風險胃納就此回升,只係之前唔少股份太過超賣,先出現技術性反彈。由於資金流入超賣股份,之前資金避險嘅樂園,公用股今日普遍回軟,不過回吐壓力又唔算大。至於恒指方面,期指結算前有大戶托番高個市,轉倉方便淡友下月部署。恒指阻力喺27600點,若然喺27400水平唔能夠企穩,港股喺結算後仍有機會再度向下尋底。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads