熱門:

2019年5月17日 即巿股評 港股直擊

【輪證贏家】斬手指唔搞正股...住

噚日喺[下半part]跟進過隻騰訊(00700)牛證(68250),講過「(騰訊)5分鐘圖SlowSTC(14,3)都上返去中軸至超賣水平,唯獨是騰訊走勢就好似唔多跟」呢啲異樣都唔係第一次見,喺下晝2點55分,5分鐘圖SlowSTC(14,3)上到7X至8X水平,但騰訊正股走勢仍然都係橫線一條,既然前設「有咩異樣就立斬」嘅時候,就趁(68250)都仲做緊$0.3呢啲位,一係輸兩格,一係平手就走(視乎你邊個位入啦)。

今朝準備出門口時剛剛開始做U盤,見到騰訊升唔知6個幾定7蚊,心諗:唔通自己做錯決定?都話咗睇正股無睇市咁叻架啦,十次有七次都Hi嘢嘅!(小妹喺度強烈建議你哋,如果你望到條大題就知嗰日講正股嘅話,請skip咗嗰日唔好睇,唔該晒!)到喺巴士準備出隧道時,U盤做完,見到騰訊升0.4%,心裏面即刻話自己「蠢」(其實係再粗口啲架)。巴士上見到啱啱放完大假、去完清邁一趟嘅同事阿Jo,車都未落先還返本旅遊書比我,跟手再比咗兩件手信我;返到公司再比多一件手信比我,多謝晒。

噚日仲有隻領展(00823)Call(25543),佢都有個怪現象,就係喺2點10分打後,正股股價都keep住喺$96.X嘅水平慢升,但同步見5分鐘圖SlowSTC(14,3)就巴巴聲下行,咁樣背馳法都唔慌好事,通常呢啲情況都係走為上着;反正,喺早兩日已經將隻恒指牛(63372)嘅賺幅cover咗(25543)嘅蝕幅。

依家10點24分,睇返個市見恒指暫呈高開低收格局,依家倒跌67點,做緊28207點。日線圖上見恒指一粒陰燭企咗喺條100天線之上,老老實實,呢四日嘅走勢似乎點都要上一上「下降通道」嘅頂,以依家個嚟睇,仲似乎一度穿過條「下降通道」頂添。 埋條保歷加通道出嚟,呢三日恒指終於都屈返上條保歷加通道裏面,但可惜嘅係保歷加通道口keep住拓闊,返到入去都唔等於佢唔會因為保歷加通道口拓闊而停止下行。

上方20天線(29303點)準備跌穿50天線(29263點),又一個「死亡交叉」會出現,100天線有無力,就真係睇吓個市之後有無催化劑啦。

依家10點38分,恒指跌幅擴大至過百點,以現價28141點計,就更係同下方牛證第一梯隊27900至27999點近啦,呢度有相當於659張期指;第二層27800至27899點就有706張期指,呢層已經係重貨,咁睇嚟大家對「升市」/「博反彈」呢件事憧憬不大。上方熊證最貼價係29000至29099點,同現價距離太遠啦,但就有1550張期指係度招手中,不過見依家恒指下行,呢「最貼價」嘅都可能見好即收,因為今日係Happy Friday嘛!

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

放大圖片

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。