熱門:

2019年5月6日 即巿股評 港股直擊

【盤房來料】恒指回補上升裂口試找支持

「畀你估得倒,點算特朗普」,當全世界以為中美貿易談判終點在望,本來今個星期中國將出動過百人代表團赴美進行新一輪談判,最快雙方可於今個月內達成最後協議,特習會或可能發生,但係隔晚侵侵喺社交平台發功,突然反面不認人,抱怨談判進展過於緩慢,威脅對中國2000億美元中國商品已加徵嘅10%關稅,今個星期五起上調至25%。

中美貿易談判形勢急轉直下,侵侵咁樣落中國面,中國唔會咁輕易低頭,已表示原定今個星期赴美嘅計劃取消,拉隊離場,雙方暫時離開談判桌,投資市場平添波濤,一個帖文激起千重浪。恒指裂口低開739點後,跌幅雖然曾收窄至697點,見過半日高位29384點,可惜A股跌勢更凶猛,拖累恒指跌幅再度擴大,恒指失守50日線(29297點),最多跌1125點,見28956點。恒指中午報收29086點,跌994點或3.3%;國指則跌418點或3.6%,報收11156點。A股跌得更加慘烈,半日大跌報收2918點,失守3000點,跌159點,跌幅半成。

藍籌股全軍覆沒,主板半日成交額已達789億元,沽壓唔嘢少,騰訊(00700)盤中低見370.2元,中午報收372.4元,跌4%,已拖低恒指123點。友邦(01299)及大笨象(00005)分別跌3.3%及2.5%,而四大內銀股跌幅由2.4%至3.2%。

除咗內銀股腳軟,內險股及內地券商股跌幅更大,平保(02318)跟國壽(02628)分別跌5.3%及7.6%;內地券商股跌幅更大,閒閒地跌逾8%,更有內地券商股跌幅超過一成。而中美貿易戰敏感股份沽壓更大,萬洲國際(00288)跌8.6%,係表現最差藍籌股,吉利汽車(00175)跌幅亦達7.5%,而曾經係中美之間嘅磨心中興通訊(00763)亦跌逾一成。除咗中興死死下,其他手機設備股亦係重災區,跌幅閒閒地超過6%。

另一個重創板塊係航空股,尤其內地飛機急墮,主要係人民幣大幅波動下挫,內地飛機梗係無運行,國航(00753)跌11.2%,喺國指成份股中包尾;而南航(01055)跟東航(00670)則分別跌9.6%及8.7%。國泰(00293)唔受人民幣重挫影響,但半日亦要跌3.1%。

港股已經幾個月未試過單日咁大跌幅,被欺壓咗幾個月嘅淡友,今日真係要多謝侵侵,不過侵侵行事飄忽,今日就口口聲聲威脅,但唔知邊日又挑起條筋,拎起個電話想同習大大吹水,話唔定吹多兩吹又話friend 番。所以呢幾日環球股市將會波濤洶湧,太多未知數,少做少錯,呢個時候都係睇定啲,未宜進取,至於有貨喺手未逃走,喺29000邊就無謂低位打靶,反而睇吓29000呢個位守唔守得住,話晒今日完全回補咗4月初遺下嘅上升裂口。回補裂口之後,只要守得住29000,話唔定侵侵一個帖文,市況又再度逆轉。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads