|
熱門:

2019年4月16日 即巿股評 港股直擊

【輪證贏家】有無人知個市想點呀?

噚日本來揀咗兩隻恒指牛(63086)同(61708)出嚟打算為上個星期五(4月12日)下半場隻恒指熊報仇。喺朝早11點30分至上半場完場時,5分鐘圖嘅SlowSTC(14,3)落到超賣水平,打算心慌慌咁睇吓當時(63086)同(61708)咩環境啦,結果(63086)已經率先被打靶,更係啦,呢隻嘢講到明係極度貼價架嘛。

至於(61708)嘅平均買入價就係$0.044,下半場開市之後恒指係有出現過跌幅收窄,講緊嘅係1點30分至1點45分嘅事,但呢個時候5分鐘圖嘅SlowSTC(14,3)就連中軸水平都上唔返,跟手又開始俾油咁向下沉過,最後喺1點55分30000點再度失守,成個好利走勢都失晒,最後就只好將隻(61708)率斬纜。

啱啱幫完Sales作完文之後(佢份presentation要介紹隻app),依家已經10點17分,恒指今朝早低開5X點之後跌幅有所擴大,至依家跌122點,做緊29688,今朝一開市先殺29800至29899點嗰130張期指,依家連29700至29799點嗰21張都唔放過,難道佢真係會放過29600至29699點嗰1140張期指咩?

說話真係唔好咁講,記唔記得點解噚日會咁獨注一擲(正確喺講係兩擲,只係有一擲未擲先死)去搞隻恒指牛?就係因為睇中佢30200至30299點嗰堆過千張期指之嘛!學讀者cheukpong2014話齋:今日(噚日)殺咗好多衍生工具,唔通大戶開始識落trap?放堆熊證過夜引你買牛證?如是者,呢堆牛證今日就死得仲慘,好彩噚日見勢色唔對就斬纜。

噚日嗰次再加埋前日下半場嗰次將前日上半場所贏嘅全數回吐,賬面上打個和唔緊要,最麻煩就係輸咗嗰道氣有機會令自己再落錯決定;如果依家個市真係咁古惑,頭先失守29700點後,見29600至29699點同打落一層(29500至29599點)呢兩層各有過千張期指,就好快咁諗落隻熊仔出去殺牛。

不過依家你見恒指跌幅又收窄咗,剛剛10點32分見仲倒升20點添,同時相信喺29600至29699點呢過千張期指街貨見風頭火勢,就更係走人為上,對個市嚟講再硬要向下殺多100點,落到29500點附近嘅話,成本都唔細,「咁唔通個市又彈返上去,目的係放啲牛證喺度引啲熊證入市?將噚日個『計劃』調轉頭做多次?」你唔比佢由依家開始至全日收市都係hold住升幾十點,做一個爭持樣出嚟,或者可能無啦啦又企喺牛熊證中間,引晒牛熊兩邊證入市,一個唔該聽日同你食晒兩家茶禮咩?今日姑且唔落場,就睇吓個市係咪咁賤。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。