熱門:

2019年4月15日 即巿股評 港股直擊

【盤房來料】人行4月份內降準話唔埋

美股上周五做好,道指再爆升逾200點,加上市場憧憬中美貿易談判已近尾聲,雙方達成協議在即,而內地新增貸款以及社會融資數據勝預期,而上周五內地公布嘅出口數字更加遠超預期,推動港股今早回升,早段更曾升逾300點,創十個月高位。

恒指高開210點,報30119點,其後升幅進一步擴大至370點,高見30280點,係去年6月15 日以嚟十個月新高,其後升幅大大收窄至127點,曾見30037點半日低位。中午恒指報收30084點,升174點;國指半日報收11760點,升100點。

講咗十萬九千次騰訊(00700)短線目標為400元,即使花旗上調目標價至453元,騰訊仍難突破400元呢個阻力位,半日倒跌0.1%,報收393.4元。風水輪流轉,上星期騰訊威威,今日輪到金融股發力,仲要係無分中資外資乜資,金融股全線上升。

友邦(01299)升1.4%,重上80元企穩,而沉寂多時嘅大笨象(00005)則重返250日線之上,半日升0.8%,報收67.45元。內銀股亦全線上揚,普遍升幅超過0.5%,建行(00939)更升逾1%。內險股表現標青,平保(02318)升1.9%,創52周新高,其他內險股升幅更厲害,當中新華保險(01336)更升半成,資金明顯流入金融股,事關呢個板塊相當騰訊又確係落後咗啲。

內地融資數據有睇頭,內房股亦做好,整個板塊全線上升,融創(01918)半日升4.7%,其他內房股普遍升1%以上,唔少內房股升幅更超過3%,當中越秀地產(00123)獲花旗調升評級及調高目標價,股價創近四年新高,半日升3.1%至1.93元。

上周阿Man曾經喺社交平台提到洛鉬(03993)今年將翻身,半日升2.8%,今日金屬資源股整個板塊上升,有資金流入,大部份資源股半日錄得超過2%升幅。不過都要溫馨提示,資源股炒作短癮,高追唔過,宜趁回調吸納。

另一可以注意板塊當然係內地券商股,雖然MSCI表示全中國指數轉換為MSCI中國全股票指數,由6月1日延期至11月26日,理由係要畀市場更多時間作準備。延期總好過遙遙無期,暫時未見市場有太大反應,反而內地券商股今日上半場表現唔錯。始終炒呢啲消息係炒預期,既然都知11月底MSCI中國指數將轉換,內地市場仍然有優勢。至於上周傳得幾行人行將降準,但始終呢個係傳聞,不過人行做嘢經常都係好難估,加上人行嘅放水政策有一定延續性,1月降準後會否係三個月後嘅4月份再度降準話唔埋,A股好做港股好,所以就算大市喺30200至30400有幾大阻力都好,暫時都唔多適宜進取做淡。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads