|
熱門:

2019年2月11日 即巿股評 港股直擊

【盤房來料】5G概念股逢回吐吸納

雖然美國已表示喺3月1日貿易談判死線前,侵侵跟習大大唔會見面住,一度拖累美股上周五早段曾跌逾200點,其後美股跌幅收窄,納指跟標指更倒升。周末期間美國表示雙方談判進展理想,唔排除兩國元首通電話後,將3月1日談判死線延遲,市場對中美貿易談判重燃希望,預期兩國最終能結束為時接近一年嘅貿易戰。

港股早段略為低開18後,最多曾跌98點,見27847點半日低位,其後A股反覆造好,港股亦重上二萬八點,恒指最多倒升102點,見28049點,中午報收28009點,升63點;國指報收10965點,升8點。

騰訊(00700)半日升1.2%,加埋平保(02318)升0.8%,兩重磅股帶動大市反覆向上。不過之前日日坐直昇機嘅領展(00823),有立法會議員建議立法規管,雖然阿Man覺得喺自由經濟嘅香港,規管領展點去做生意唔多可行,不過領展股價乘機回吐,半日逆市跌0.5%,相對之前累積升幅,幾乎唔覺有回吐壓力。

蘋果已預期手機銷售放緩,但蘋果手機唔等於全世界,台灣大立光1月收入較場市場預期好,手機設備股落鑊。瑞聲(02018)跟舜宇(02382)雙雙半日升逾5%;小米(01810)本屬新經濟股,但查實之前阿Man都講過,小米查實係半隻手機股,公司下周將公布全新旗艦手機小米9,股價半日同樣錄得超過5%升幅。話咗5G概念股係今年重點落鑊板塊,建議逢回吐吸納,今日呢個板塊又再開鑊剷派對,京信通信(02342)升8.9%;摩比(00947)升6.3%;中興(00763)升3.2%;中通服(00552)升1.8%。今年呢個板塊係重點鑊剷股,記住呢幾個冧巴無乜點錯。

內地券商股個別發展,不過阿Man對整個板塊仍然睇好,盡量揀晒士較大隻嘅龍頭,包括中信証券(06030)、華泰證券(06886)、中國銀河(06881)等等。友邦(01299) 喺春節假期前,突然獲批於天津及石家莊籌建營銷服務部,其股價於假期前後爆升,股價更創年內新高,目前高位靠緊,睇嚟要升破75元之前高位無難度。

至於大市又係跌唔落,可惜係二萬八樓上唔係話企穩就企穩,暫時喺二萬八點前整固,但咪以為上個月大市反彈咗超過3000點,呢一個月就要插水,阿Man估計今個月極其量都係上落調整,上落區間大約喺27000至28200點,一旦貿易戰有任何好消息,大市一躍而上挑戰250日線(28405點),下一步可以挑戰二萬九水平。

麥狄文

(徐狄怡 ‧ 證監會持牌人‧ 大錦證券有限公司董事)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。