隔晚美股個別發展,科技股仍然有良好現,主要係Facebook去年第四季盈利刷新紀錄,帶同科技股做好,納指隔晚升近百點,標指亦錄得進賬,只有道指早段下跌逾百點後,其後收窄跌幅,但仍要跌15點,不過已足以帶動隔晚港股喺ADR同夜期重上二萬八大關。港股今早高開250點,報28193點屬半日高位及創五個月以來新高,可惜內地財新1月份中國製造業PMI跌至48.3,遠差過市場預期,並創三年近低,拖累大市倒跌。半日恒指跌87點,接近半場低位27852點,報收27854點;國指亦高開低走,半日僅升15點,報11051點。
預咗騰訊(00700)喺340元至350元呢一要整固一下,半日最高見352元為五個月高位,中午報收347元。查實QQ喺350元至359.8元,有為數唔少嘅熊街貨,但望一望下面嘅牛證街貨,喺320元334.8元亦有一大堆,睇好睇淡嘅投資者都有,當然要近便就手,梗係先挾高幾蚊上去屠熊。至於另一大成交重磅股,係阿Man上周重點推介嘅平保(02318),昨日已升抵75元目標價,今日再下一城,盤中曾升逾2%高見77.8元,中午報收77.15元,呢一輪目標價當然略為調高至80元,有貨喺手以75元為止賺位,未買貨想博,都係搵75元做個好淡分界指標。
金融股見回吐,大笨象(00005)跟友邦(01299)分別跌1%及1.8%拖累大市,而內銀股回吐壓力唔算大,跌幅少於1%。要數呢期最誇張都算係領展(00823),連日新高再新高,今朝再創86.9元新高後回吐,跌穿埋噚日收市價,可能呢一輪升浪要告一段落。不過本地地產股仍有資金追捧,主要係美國縮表或提早完成,聯儲局放晒鴿,今年息魔應難以威脅市場,地產股有呢個因素撐腰,就算唔再大升,都唔會跌得去邊。
查實今日周末前夕,下周一年三十晚得半日市,半日成交額仲維持喺500億樓上都算係咁,唔少人見今日大市見過高位回落,下周一又係立春呢個日子,兼且又係2月4日,唔少淡友都出嚟大叫要轉勢。技術走勢上半日確係差咗啲,但未到收市嗰一刻,仍難確認出現烏雲蓋頂嘅利淡走勢,阿Man唔慣扮先知,短線博回吐,見27800守得住都要將短炒淡倉先了斷,況且下星期幾日假期,寧頭吉倉過新年,咁先可以大吉大利,輕鬆送狗迎豬。
麥狄文
(徐狄怡 ‧ 證監會持牌人‧ 大錦證券有限公司董事)