|
熱門:

2019年1月16日 即巿股評 港股直擊

【盤房來料】指數高位整固窄幅徘徊

美國聯邦政府持續停擺,雖然已有專家警告,停擺持續落去,有機會令到美國經濟增長歸零,但華爾街一於少理,尤其係聯儲局放晒鴿,而中美貿易談判似乎有計傾,再加埋內地嗰邊阿爺開始發功,一時之間市場氣氛大好咁款,美股係咁矣跌咗兩個交易日,隔晚又回復升勢,三大指數上升,納指更重上50日線收市,係自本月4日以嚟第一次收得咁鬼靚仔。

港股噚日愈升愈有,市場憧憬阿爺全方位救經濟,有助谷起股市,咗之前財政部跟發改委就指出要穩住汽車及家電等,之前宣布嘅定向降準周二開始落實執行,再加埋人民銀行按計劃公開市場合共進行1800億元人民幣嘅逆回購操作,以維持市場流動性充裕,曲線向市場放水。至於國務院批准QFII投資總額由1500億增至3000億,理論上外資流入A股將加,但阿爺批大個額畀人一件事,人哋買唔買又係另一回事,所以A股唔見得因為呢個消息而興奮起嚟。
至於今日港股表現都算係咁,米字旗國一如預期vote down咗個脫歐協議,當地甚至整個歐洲金融市場不確定性增加,港股應酬一下都要低開。恒指低開127點後跌幅擴大,最多曾跌262點,見過半日低位26567,不過喺100日線(26388點)上面支持力不俗,跌幅逐步收窄至僅跌2點,高見26827點。恒指中午報26763點,跌66點;國企指數報10487點,跌15點。

家下大市唔上唔落,睇番牛熊證街貨分佈,喺26800至270199點呢300點內,儲儲下又近三千張期指嘅熊仔街貨擺喺度,斷估大戶唔會放過淡友,大有機會食埋呢堆熊仔,大市先會出現較大幅調整。目前大市只係上周急升後高位回吐,仍然守住喺多條移動平均線之上整固,做淡似乎未係時候。

重磅股有啲腳軟,騰訊(00700)暫未能企穩330元,但325元守得住,阿Man維持短線目標喺335元至340元。其他重磅股表現麻麻,經過噚日急升後,今日普遍要回一回氣,除咗內險股表現較佳,皆因阿爺加大QFII額度,市場憧憬A股未來價量齊升,內險股當然受惠。而阿Man上周叫留意嘅內地券商股同樣做好,A股未來或有好日子過,唔單止內地券股受惠,港交所(00388)亦值得望多兩眼。

有大行報告指內地醫藥股被嚴重低估。好老實呢個板塊之前又確係被洗板洗至甚為低殘。龍頭中生製藥(01177)跟石藥(01093)較高位回落一半,現價確係吸引唔少資金回流。不過始終藥股充斥住蟹貨,向上要突破每一個關鍵位都有難度,想炒得舒服啲,股價今日急升切勿高追,話晒都升至日線保力加通道頂,唔排除又要抖氣。

人家美股科技股大幅反彈,我哋呢邊嘅新經濟股跌到一個七皮。講緊係剛過咗禁售期,股價屢創新低嘅小米(01810),噚日又被「煙出挑唇」投資者以每股9.45元減持,真係唔知邊個咁勇去接當頭跌,股價今日半場再跌逾4%。

指數方面,守住喺26600上面都係做好為主,家陣喺26800水平爭持,只要外圍無出現突如期內大鑊嘢,港股仍有機會向27000挑戰。至於早就相信阿Man港股唔穿26000暫時未死得,已上咗車持貨嘅投資者,不過將個好倉盤止賺又set高少少去26400點,即使大市急轉變向下,仍然仲有油水撈。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。