熱門:

2019年1月16日 即巿股評 港股直擊

【輪證贏家】一個運氣好嘅人同我講今日跌

噚日下半場見到個市愈升愈有,真係好想拎把刀仔出嚟拮大脾,與此同時我嘅左邊天使同右邊魔鬼又再出現,天使話:好啦!收手啦!唔係連渣都無啦!重整心態再同市追過啦,乖啦;但魔鬼就話:挑!都輸到呢個位啦,同total loss有乜分別?就把心一橫博一鋪啦,反正都係囉,啱唔啱先?天使同魔鬼向來都只能二選一架啫,咁最後就更係魔鬼贏啦,如果唔係我又點會喺[下半part]度呼籲各界淡友一齊跳「求跌舞」呢!

今朝開電視見到話噚晚英國傾脫歐條件單嘢最終都係被否決,仲話要同文翠珊提出不信任動議; Well,被否決就預咗嘅,不信任動議又估話最終會唔成功嘅,Any肥,當我今朝出門口之前,諗住去多個廁所,之後再望一眼個電視機最底條走字走唔走到隻友邦(01299)出嚟啦,話就話都去到咁嘅田地啫,但望一望都心安理得啲呀,結果我喺廁所出返嚟見到嘅係我家老爺熄咗我部電視...算!咁咪落街等巴士返工囉,又事緣有一版candy crash由噚晚到依家都過唔到版喎,於是我比我家老爺幫我試吓打啦,不消兩分鐘佢比返部電話我,仲同我講:「乜真係咁難打咩?」佢一嘢就同我過咗版;接住個版Ultra Hard佢都一樣照同我一鋪過,心諗:你條肥仔今日有啲運咁喎。於是就隨口問只愛利物浦而不知股票為何物嘅佢:今日恒指升定跌?佢好堅定咁答我:跌;嗯,那是9點24分,U盤做完恒指開局跌120幾點。我再問:咁全日呢?我聽到佢第一吓同我講話係升,之後再轉軚話跌,仲跌到好甘個隻。

依家9點59分,恒指做緊26744點,跌84點,中間有一段時間跌逾250點;至於友邦就跌0.4%,做緊$69.35,暫時最低見過$68.55;至於隻友邦熊(66189)今朝最高見過$0.018,而依家就做緊$0.012,升9.1%,係咪好多呢?梗係啦,個base細嘛,數落都係升1格咁大把。

我唔知今日全日恒指個走勢會唔會正如我家老爺所講會跌到好甘(我都極度有理由相信佢都係是但噏),開牛熊證街貨圖就見到上方貼價熊證真係愈嚟愈多貨,講緊頭三part,即26800至26899點、26900至26999點同埋27000至27099點呢度,已經分別有851、1025同1104張期指。至於27500至27599點呢度都有1073張期指,梗係啦,500點一小關、齊頭1000點一大關嘛。至於下方嘅牛證,唉,去到依家最近嘅都只係25900至25999點,而呢度就只得463張期指,啲牛仲瘦過西貢嗰啲。

照咁睇恒指繼續上行嘅機會都真係好高,不過我仍然都係在意住友邦嘅日線圖高位回落個look,噚日一支大陽燭向上叉咗上去,搞到10天線($65.870)升穿咗條250天線($65.634),生咗個「黃金交叉」出嚟,同時條0天線($64.33)同條100天線($64.367)又行得好埋。但今日粒燭暫呈肥咗嘅「十字星」,同時今日係第六日升穿保歷加通道頂啦,恒指都無你咁狼死。(66189)短時間嚟講翻身係爭啲嘅,但輸少啲都唔難嘅(呢隻嘢將我上一鋪恒指牛嘔凸,激死朕)。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads