熱門:

2019年1月14日 即巿股評 港股直擊

【輪證贏家】友邦見「平頂」 幾好Put喎

上個星期五(1月11日)喺[下半part]仲喺度講緊恒指SlowSTC(14,3)超買得咁緊要,呢啲位應該Put;但同時見上方熊證啲街貨咁多又咁重,左右為難嘅情況之下都係選擇以不變應萬變,係呀,即係咩都無做過。

噚晚唔知大家有無睇99台播嘅蠟筆小新劇場版,我有喎(呢啲卡通片我係唔會放過嘅),結果睇完都唔知係咪興奮得滯,竟然失眠,今朝遲咗起身就梗係架,唯有以最快嘅速度出門口,結果依家9點55分我已經坐喺個位度;「你要打卡咁準時架咩?」唔使呀,我懷疑我唔返我老細都唔會知添,不過都唔等於太過分同離譜架嘛。

呢個鐘數望望恒指,依家做緊26316點,跌351點,日線圖上現價失守100天線(26406點),莫非真係正如上個星期四(10日)【輪證贏家】所講,向上「穿一穿條100天線...情況就好似12月3日同4日一樣,點都穿一穿條100天線先再算。」(當時係手揸牛證但求有一扇逃生門)?到依家當日隻牛仔就梗係走咗啦,而今日最終會唔會低收於100天線仍然未知,但肯定嘅係日線圖上SlowSTC(14,3)%K線同%D線雙雙踩上「9」字頭,高位回落都怕且係技術調整所需,但依家麻煩就麻煩在於現價嘅水平大約係牛熊證中間位。

唔想搞個市?好易啫,搵個股落場咪得囉,其實有部分藍籌個走勢都有少少似恒指,騰訊(00700)當然係其中一隻啦,但係我嫌佢條保歷加通道太窄啦,所以我會傾向友邦(01299),同樣地日線圖上嘅SlowSTC(14,3)%K線同%D線齊齊踩到上嚴重超買水平,雖然現價企喺五條主要平均線,不過以目前(10點10分)為止,今日高位$67.45同上星期五高位$67.5,可以話係一個「平頂」格局,仲要第一粒星係「T星」添,平得嚟仲唔落?

換條保歷加通道出嚟,今日已經係連續第四個交易日高位都升穿過保歷加通道頂部,睇嚟都係時候要瓹返入去,友邦熊(66189),收回價$69.88,同現價有逾4%差距,槓桿比率約16倍屬偏高水平,可吼友邦5分鐘圖見超買時落場。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads