今朝起身幾乎見唔到出面條街，事關我本身住嗰度已經係屬於極度潮濕地區，年年成個區嘅大廈都會喺FB參加「最潮濕屋苑走廊比賽」，估唔到今年真係提早咗，望望電視個濕度有成91%，睇嚟今晚放工返到屋企兩部抽濕機要同步開工啦。
呢兩日其實個市都好濕呀，噚日有956.7億成交，前日(星期三，9日)仲過千億添，咁大成交做助力，噚日收市已經升穿咗條100天線啦，只係隻恒指牛(60661)證價未有反應啫。今朝恒指開市報26692點，升171點；到依家9點53分，恒指升幅一度收窄，仲出現過倒跌，半個鐘唔駛就補咗今朝早個裂口，跟手就回返上去，依家做緊26654點，升133點，雖然見恒指5分鐘圖上嘅SlowSTC(14,3)都仲未出現超買，反而係今朝由單嚴重超買水平回落至中軸，依家先叫做上返好超買位，不過(60661)證價都上到$0.085以上，最高就係今朝見過嘅$0.09，喺9點55分都見多一次$0.09，若然本身入(60661)注碼大嘅話，呢幾格都夠你買多盆蘿蔔糕過年食。
「唔係喎，我好細注咋喎，唔夠買盆蘿蔔糕呀，頂多去到超市買盒禮盒咋。」哦...Don't worry，依家10點3分，恒指最高做過26692點，即係話26600至26699點嗰1935張期指嚴格嚟講都全數死亡，換言之26700至26799點呢度可以話係依家最貼價嘅熊證區，而呢度有相當於1068張期指。
反觀下方嘅牛證，最貼價嘅都仲係25800至25899點呢層，同現價有800幾點差距，且呢個位置只得640張期指，都確係未有誘因向下行。
乃念個市剛啱升穿條100天線一嘢，咁手揸(60661)而細注未放嘅話，依家恒指日線圖見SlowSTC(14,3)都到頂架啦，所以今日好搵位走人；如果一早放咗嘅話，都係同一句說話：SlowSTC(14,3)都到頂架啦，我知上方26700至26799點嗰堆熊證好吸引，但似乎個市要回一回啖氣先想再上咁，睇定啲先。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
