|
熱門:

2019年1月10日 即巿股評 港股直擊

【盤房來料】大市挾上殺熊誘因較大

美股連升四個交易日,主要係聯儲局公布嘅上月會議紀錄傾向鴿鴿地,其實鮑威爾都轉口風之後,市場傾向相信聯儲局眼見通脹唔係嚴重,而又有蘋果公司咁嘅龍頭企業發盈警,都預咗今年美國加息步伐將放緩,對美股嚟講係好事,「侵侵」亦唔使一日到黑呱呱叫,話聯儲局整死美股。

雖然美股再升,但港股今早卻低開,內地公布CPI同PPI走晒樣,早段曾拖累恒指插水249點,低見26212點。不過港股幾日之間累積咗1400點升幅,由26600回到26200區區四百點,反映回吐壓力好有限。主要係美元滙價下跌,人民幣滙價向上,一度升破6.8關,帶動大市掉頭回升,100日線(26416點)失而復得,盤中曾升103點,高見26565點,半日接近高位收市,報26559點,升97點;國指亦升47點,報10405點。

查實噚日港股成交額回復千億以上,喺無任何指數做rebalancing嘅情況下算係咁,成交大咗除咗係有沽空盤冚倉之外,亦反映有資金確係買緊貨,尤其今日大市能夠喺低位拗腰再上,收復番條100日線,只要連續3日都企穩條100日線之上收市,港股要挑戰二萬七關難度唔大。雖然唔係有乜特別好消息,但睇睇牛熊證街貨分布,暫時都係再挾高殺熊誘因大,最貼價嘅熊證喺26600至26799點,經已結集咗相對於2600張期指嘅熊證街貨,而26800至27099點呢一區,亦有相等於1800張期指左右嘅熊證。再望望下面,最近嘅牛證街貨喺25800至25899點,得嗰區區424張期指嘅牛仔,25500至25599亦只有607張期指嘅牛仔街貨,完全唔成氣候,點計條數大戶都挾多四五百點上去殺熊和味啲。

至於騰訊(00700)已逼近330元水平,接近阿Man所預測嘅目標330至335元,暫且將止賺位拉高少少去323元,收市低過呢個價,都係先沽貨套利穩陣。至於其他重磅股個別發展,手機設備股反彈,汽車股亦繼續反彈,但呢兩個板塊都係趁反彈走人,高追免問。反而阿Man睇好嘅航空股仲有得諗,一來春運接近,而目前亦係旅遊旺季,加上人民幣回升,油價亦只有波幅,冇升幅,對航空股有利,三架飛機可以趁回吐吸納。

指數方面都係睇住26000至26200為回吐支持位,呢個位唔死落去,個市都係回吐,但26600左右係日線保力加通道頂部,點都有阻力唔係咁易話過就過,可能而要三兩日時間整固一下儲力再上,暫時唔會做淡住,除非中美貿易談判官方聲明出現好大反差。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。