熱門:

2019年1月8日 即巿股評 港股直擊

【盤房來料】牛熊證街貨分布 好淡未屆決戰時

美股隔晚續升,帶動港股喺夜期及ADR回勇,但始終受制26000關,即使道指期貨繼續做好,港股表現都係反反覆覆,軟弱無力。恒指今早高開16點後曾倒跌,上半場曾跌147點,低見25688點,但噚日阿Man都有提過,喺25600至25800點有一定支持,其後大市止跌回升,最多升125點,半日最高見25960點。中午恒指報收25905點,升70點;國企指數升18點,報10142點。

中美貿易談判展開,市場較為關注談判進展,雖然有心理準備今次談判未必能令貿易戰就此了斷,但一日雙方唔反枱,咁就仲有彎轉有得傾。咁啱得咁橋,今日亦係加拿大正引渡華為公主去美國受審嘅最後限期,喺中美談判開始夾正呢一日,當然唔係巧合,相信呢個議題亦係中美談判成功與否嘅關鍵之一。若然美國放過華為公主一馬,中國喺談判面或會作出較大讓步,雙方能達成協議機會大增。若然中美能夠握手言和,貿易戰就此結束,相信中港美三地股市氣氛必然大逆轉,恒指莫講話挑戰100日線(26461點),狼死啲上埋二萬七亦唔係無可能。相反,中國唔肯就範,美國繼續脅持華為公主做人質,雙方爭持不下,貿易戰僵局持續落去,三地股市定必齊齊再探底,恒指二萬五未必保得住,分分鐘連去年10月個低位都要見多次。

今日港股無乜方向,除咗中美貿易談判之外,歐洲嗰邊仲有米字旗國嘅脫歐發展,呢兩日應會落實票決脫歐協議日期,稍後相關投票結果,又會令環球市場風起雲湧。暫時缸邊友都未敢輕舉妄動,觀戰嘅多,作戰嘅少,況且今日上半場指數僅於200點左右上上落落,重磅股又唔見有乜睇頭,都係少做少錯,眼看手勿動。

再睇睇牛熊證街貨有冇啟示,熊證街貨重貨區喺26600至26699點,街貨相等於約827張期指,而26200至26299點亦係另一重貨區,相對期指約821張。至於牛仔呢,最肥和牛喺24800至24899點呢一個區域,相對期指約1503張,而最多新增街貨區喺25500至2599點,相對新增期指約451張。睇落牛熊兩邊街貨係五五波,好淡雙方未有耐要決勝負,不過牛仔最近重貨區仲有成千點,而熊證最近重貨區不過兩三百點距離,求其搵個所謂好消息挾多浸,殺埋呢批熊證再落去劏牛都未遲。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads