話咁快又過完聖誕節,呢個聖誕美股認真快樂,先係平安夜快快落落,道指連22000關亦失守,三大指數幾乎全陷入技術性熊市調整。以為放過聖誕假期美股係咁先,誰知喺扑醒地美股作報復式反彈,隔晚三大指數勁升,更創下多年以嚟最大單日指數升幅。美股之前急跌主要因為「侵侵」硬頸,喺國會唔放行有關美墨圍牆撥款,寧願唔批所有政府預算,寧願政府停擺都個個認同佢嗰一套,結果政府部份部門停止運作。本來美股已因為聯儲局議息會議未有放鴿,兼且市場正擔心美企前景而搖搖欲墜,家下再加埋政府停擺,再傳出「侵侵」欲向鮑威爾派大信封,完全係雪上加霜。白宮眼見美股走晒樣,即表示鮑威爾地位穩如泰山,「侵侵」亦無意炒佢魷,再加上美方表示下月7日將派員到中國跟中方官員繼續貿易談判,向市場大派定心丸,美股即大幅反彈。
港股今日亦跟隨美股強勁反彈而高開,恒指高開167點後,升幅一度擴大至269點,高見25920點,其後內地公布上月工業利潤跌1.8%,加上10日線(25941點)及50日線(25910點)有阻力,港股升幅大大收窄至85點,低見25737點。半日恒指報收25811點,升160點;國指則升69點,報收10132點,半日成交額縮水至265億少得可憐。
本來呢個月港股成交額已買少見少,加上聖誕節長假,唔少缸邊友拎多四個工作天假期,就可以放超過十日長假,唔少人早已被濃濃假日情懷浸沒,股市上落早已拋諸腦後。大市反彈重磅股當然向上,不過之前美股插水港股唔跟足,家下勁彈港股亦無份,只係象徵式彈番些少,暫時恒指喺25800水平附近上落,重磅股升幅有限。油價隔晚大幅反彈逾8%,三桶油自然跟住彈,不過阿Man之前都講過,油價積弱甚深,縱有反彈亦只係短暫,要扭轉長期弱勢無可能,三桶油反彈都當睇佢唔倒,值博率根本好有限。
至於5G概念中國鐵塔(00788)仍見資金追入,今日再創上市新高1.57元,半日企穩高位收市,其實之前阿Man都講咗,中國發展5G嘅決心,政策傾斜將有利相關概念股,喺未有其他板塊有主題炒作嘅情況下,5G概念股仍可以睇高一線。
麥狄文
(徐狄怡‧證監會持牌人)