|
熱門:

2018年12月20日 即巿股評 港股直擊

【盤房來料】港股已跌至接近移動區間底部

美股呢期除咗個弱字,真係無其他形容詞適合,隔晚美股早段彈得好地地,市場唔單止認為中美貿易關係有好轉,美國話國際貿易問題都係時候重啟談判,市場早段氣氛唔錯,道指一度升逾300點。可惜聯儲局一如預期加息一個骨之餘,未有狂放鴿,更指經濟狀況令未來加息路徑更模糊,聯儲局都咁講,市場梗係擔心美國經濟前景灰灰地。美股急轉直下,道指倒跌更一度插水超過500點,最終道指埋單跌351點,標指亦跌逾1%,科技股係跌市領頭羊,納指跌逾2%。

港股低開141點後,早段仲得幾吓頭鎚,跌幅曾收窄至不足5點,見過25860點半日高位,可惜大戶只係托住一隻騰訊(00700), 起勢沽其他重磅股,尤其息口敏感嘅地產股,跌勢更明顯。半日恒指報收25574點,跌291點;國指則跌126點,報收10069點。大市創咗近一個月低位,唔覺唔覺由27200水平落到嚟,又去番之前阿Man所講嘅月內移動區間接近底部位置,即25200點附近,目前保力加通道底部喺25385點左右,而牛證重貨區今早KO咗25500至25800一區域,下一重貨區喺25400至25499點,若然下半場搞掂埋呢堆牛仔,差不多係時候反彈。總之大市仍然於區間內運行,25500點27500點係月內移動範圍,暫時高位大約係27300,高點未達標,而低點可能又些少超標,但今個月結算極有可能中間落墨,不過美股近日跌勢頗凶狠,港股可能反彈至26000至26200點左右埋單。

其實中港股市喺呢個月相對美股跌勢,已屬於相當溫和,主要係2018年度已走到最後一個月,基金大戶要買嘅買晒,要沽嘅亦沽得七七八八,而港股喺第二及第三季一直跑輸外圍,到第四季定落嚟亦好正常。睇番呢期大市成交額愈玩愈縮,擺明係買賣兩閒,缸邊友眼見聖誕假期在即,下星期又到期指結算,倒不如離場觀望。

個別板塊確係無眼睇,上半年熱炒嘅醫藥股同教育股,徹頭徹尾畀政策玩死咗,由呢兩個板塊開始急跌,阿Man已呼籲大家咪手多博反彈,結果係兩個板塊股份有最低,只有更低,話咗當中反彈就當睇佢唔到,錯過反彈反而時運高。至少濠賭股亦係今年初阿Man已唔睇好嘅板塊,結果今年由頭沽到落尾,由於經濟放緩關係,濠賭股肯定收入大不如前,加上澳門博彩牌照將於2020至2022年陸續到期,更加濠賭股平添不明朗因素。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。