熱門:

2018年12月14日 即巿股評 港股直擊

【盤房來料】周末前夕無把握先離場

隔晚美股表現反覆,雖然中美貿易談判大有進展,中國已恢復向美國買入大豆,但要完全滿足美國向中國所提出嘅142項要求唔容易,話就話喺呢場貿易戰上,美國一直佔上風,但亦唔代表中國要完全跪低滿足狂人侵侵所有要求,中國即使跪低都想跪得好睇少少,估計呢場談判要有段時間要拉鋸,美股走勢自然較為反覆。早段美股高開,道指曾升逾200點,但其後升幅蒸發曾倒跌,最終只有道指能錄得70點進帳,標指靠穩跌不足1點,納指則跌28點。

至於港股呢隔晚喺夜期跟ADR已率先回吐調整,今早承勢低開305點後,報26219點為半日高位,10日線(26387點)跟20日線(26317點)得而復失,兩條線距離愈收愈窄。早段跌幅曾擴大至459點,低見26065點半日低位,其後跌幅收窄,成功守住二萬六關及50日線(25932點)。恒指中午報收26159點,跌364點;國指報收10402點,跌154。

雖然國統局已表現今年應可實現6.5%左右嘅經濟增長目標,但內地工業零售數據遜預期,中港兩地股市難免有回調,加上港股連升三日,低位反彈千點,正常回套三幾百點,仲要係周末前夕缸邊友唔會積極入場,半日成交額只有342億元,交投淡靜。

話就話炒股唔炒市,但個別股份表現參差,暫時亦唔見得有睇頭,重磅股普遍回吐,實在唔覺得有乜好炒。騰訊(00700)盤中曾低見307.8元,但20日線支持不俗,守得住308元之上,短線回吐可以接受,20日線附近甚至係入貨好機會。今日跌得較多嘅重磅股係中移動(00941),半日股價跌3.2%,不過中移動一向係升市藍燈籠,此股下跌反而唔係壞事,至少反映市場避險情緒未見升溫。

周初被沽空機構狂踩指一文不值嘅恒安(01044),早段股價曾下跌,但半日拗腰倒升1.4%,話咗被沽空機構指控後,股價都係跌一成左右相當溫和,似乎市場唔多相信恒安盤數全面做假。萬洲(00288)仍受豬瘟事件所影響,半日股價跌5.2%,係跌幅最大藍籌,喺豬瘟未退減前,萬洲暫未宜沾手。油價話就話低位有支持, 可惜反彈乏力。噚日阿Man已喺社交平台表示三桶油追唔過,再買三桶油博率有限,油價弱勢未改,三桶有只會反覆,難見升幅。

預計大市午後表現仍然呆滯,能守喺50日線及26000關之上算有交代,短線支持仍然係50日線,若日內能重上10及20日線企穩,後試再挑戰10及20日線,甚至繼續向上試埋條100日線亦有可能。講到尾又係牛熊證作怪,大市踏入12月後先低後高,大戶先劏牛,後屠熊,目前牛證重貨區為25400至25700點,熊證則喺26600至27000點。呢個位距現價都係四五百點咁上下,大戶有心做嘢,喺市況成交薄弱下,舞高弄低再大小通吃亦唔出奇。唔想打冇把握嘅仗,倒不如今日離場,happy Friday!!

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads