熱門:

2018年12月14日 即巿股評 港股直擊

【輪證贏家】又係開完裂口就橫行?

身邊開始有唔少輪界同基金界嘅朋友放假,講緊都係出年見,係得我哋呢班打工仔繼續返,就算放講緊都係真正個年底先至放;做零售仲慘,你想聖誕節放假?即係你唔想撈啦!我老友Marilyn喺一間本地賣化妝品嘅公司度做媽劇停,佢哋公司今日就開Christmas Party啦,之後呢兩個星期就梗係同行開戰啦!(其實已經開緊戰)

至於我就年年12月都要對住個悶市,對多一個星期啦,我都收爐架啦,你見呢期個市彈上/落之後就橫行到收市,悶到呢,所以噚日執咗隻滙豐Call都信相係今年最後一餐架啦(暫定先啦)。依家9點51分,恒指開市見跌逾300點,依家進一步跌411點,殺返落去26113點。

猶記得早兩日(12日)喺[下半part]同埋噚日喺[輪證贏家]都有講過我一個大膽嘅假設嗎?就係按當時恒指牛熊證街貨圖計,「若然恒指下晝向上爬多幾格嘅話,再食埋呢(25500至25599點)過千張期指確實係無難度,跟手嘅就可能搵個藉口向下行」。

原本都仲係咁諗,直至噚日下晝,[下半part]咪用50點為一層去睇街貨嘅,怪就怪在個市上26581點之後玩緊「一二三,紅綠燈,過馬路,要小心」咁,唔留心你都唔知佢郁過,一拆之下先知道原來26500至26549點呢度有986張期指,即係話呢一層重貨又無晒啦;至於26550至26599點呢度就只有140張期指,who care?不過呢個情況最後會繼續如早兩日所估計嘅「上面無街貨而掉頭下行」還是噚日估嘅「愈彈愈多人追貼熊,引個市再上」?

哈哈,心水清嘅讀者應該會睇得穿呢兩個option根本就係大包圍「個市同12碼一樣,一係入(升),一係唔入(跌)架啦!你講晒啦」係呀,所以噚日朝早食咗隻滙豐Call之後我就再無做過任何動作,因為連我自己都諗唔通囉(真係諗得咁通透嘅,我唔駛返工啦!)

「喂!今朝個市跌300幾點,依家跌多咗啦,仲唔係第一個預測?」 師兄,比多少少時間你開埋個恒指牛熊證街貨圖睇,有無見到26600至26699點已經有1082張期指喺度啦?再向上數多兩行,26800至26899點呢度有722張期指呀?即係話嗰兩個大圍我各自中咗一半,今日個市係「市跌但多熊仔街貨」,最禾味就應該係26600至26699點嗰堆,夠貼價呀嘛。

錯過咗呢個下行又唔覺得好可惜喎,事關上方熊證向來都儲咗唔少街貨喺度,人家都要捱你噚日同前早兩日價先有今日嘅收獲嘅,如是者你諗吓 如果你手上揸住隻貼價熊又見個市跌咗成4XX點,你會點?「割禾青啦!仲等!」咁上面熊證咪又無晒貨囉?咁又會唔會有人反手撐貼價牛?

依家10點24分,恒指做緊26113點,下方牛證最貼價就係26300至26399點;上方熊證最貼價就係26500至26599點,牛熊兩個差距終於收窄返就多得發行商出返啲貼價啲嘅牛熊,但恒指現價慘就慘在企喺中間呢,唉~ 唔通我要做一個星期塘邊鶴?

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo(下半part):#Gladyshan#

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads