|
熱門:

2018年12月7日 即巿股評 港股直擊

【盤房來料】港股暫於20日線爭持

美股隔晚喺期假返嚟後大幅波動,又大玩過山車,早段因為市場擔心華為CEO被扣查將令中美關係惡化,甚至影響中美貿易談判,而美債孳息倒掛陰影揮之不去,令道指一度急挫近800點。其後有報道指聯儲局喺本月議息會議中,因應美國通脹已受控制,勞動市場喺經濟增長下表現強勁,將採取「觀望模式」,暗示明年加息步伐放緩,呢個消息令美股低於有支持,而道指之前兩度喺24200水平作出強勁反彈,今次亦唔例外,道指收窄跌幅,收市跌79點;標指跌4點;納指倒升29點,大部份重磅科技股均轉跌為升。

受隔晚早段美股急挫影響,夜期曾跌至25800點邊沿,其後美股跌幅收窄,夜期跌幅亦收窄,但跌穿二萬六點收市。不過美股進一步反彈,恒指喺新加玻黑期時段已重上26200水平,ADR亦見靠穩。結果今早恒指高開93點,一度升124點高見26280點,不過反彈力度麻麻,大市再掉頭向下,倒跌55點見26100點半日低位。中午恒指報收26226點,升70點;國指則跌6點,報收10474點。

大市反彈又係靠騰訊(00700),半日反彈3%報313.2元,暫時反彈阻力喺320元,不過整體大市氣氛已轉弱,今日剛好反彈至10日線313.2元,要重上100日線319.6元或有難度。其他重磅股亦見反彈,同樣力度有限,可能今日周末前夕,加上大市兩日急跌逾千點,缸邊友取態自然較審慎。大笨象(00005)喺美國加息周期或提前結束後,股價開始停滯不前或轉弱,股價今日再跌1%,反而友邦(01299)則靠穩。其他重磅股如平保(02318)及內銀等反彈不足1%。

華為供應鏈股份今日個別發展,暫只有中軟國件(00354)反彈1%,其他股份如瑞聲(02018)、舜宇(02382)及丘鈦科技(01478)跌勢持續。內地藥品帶量採購中標價降幅較預期為大,大行齊齊唱淡醫藥股。板塊洗倉未停,今日繼續顯著下跌。寧買當頭起,莫買當頭跌,喺醫藥股未成功止跌之前,勿多手接飛刀。美國加息周期或於明年完結,地產股有追捧,整個板塊均見上升。不過香港樓市已開始步入下行周期,唔建議高追。

今日大市下半場都係悶局一場,經過噚日大幅下挫後,今日反彈力度一般,暫時喺20日線(26274點)爭持,若能企穩20日線,而外圍股市靠穩的話,港股仍有條件反彈挑戰10日線(26599點)。暫時喺26400點前阻力唔細,今日連26300都唔見影,可能跟周末情懷有關。噚日期指喺26100至26200形成一個密集區,若再重返密集區之下,大市或有機會再下試隔晚夜期低位25800,如外圍股市再見急挫,港股甚至下試25500尋找支持。要扭轉目前弱勢,除非能重返100日線(26928點)之上,否則港股隨消息於50日及100日線之間千點上落。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。