上星期無論港股同美股都係悶到嘔,美股走勢偏軟,主要係科技龍頭全部腳軟,但可能同上周感恩節假期,市況轉趨淡靜有關。上周恒指波幅不足一千點,50日線(26191點)一直係上周阻力,而恒指日線圖走勢更漸成三角形走勢形態,準備爆邊。結果今日港股唔聲唔聲,嚇你一驚,恒指半日悶吓悶吓升咗超過400點,雖然半日成交額只有420億左右,未能配合升勢,但正因為成交薄弱,大戶要舞高弄低指數實在易過如反掌。
恒指今早高開171點,開市後升幅一度收窄至104點,見26032點半日低位。雖然A股表現平平,早段更曾下跌,但無礙港股升勢,恒指升穿50日線,半日最多升486點,見26414點。恒指中午報26367點,升439點;國企指數報10524點,升135點。
大市向上當然唔少得騰訊(00700)跟友邦(01299)呢一對重中之重嘅指數權重股,騰訊半日最高見298.6元,短線阻力仍然喺300元,升得破呢一關自然係向上再挑戰310元,暫時支持位上移至290元至292元,跌穿支持要小心。友邦半日則升2.3%,短線阻力位喺66元,升得穿海闊天空,支持位63.6元。
其他重磅股全線向上,大笨象(00005)跟平保(02318)升逾1%,其實自平保成為大笨象單一大股東消息曝光後,大笨象股價表現較為硬淨,雖然唔知道平保仲會否加碼,但至少街貨的而且確係少咗,對股價間接有支持。至於內銀股今日表現亦唔差,普遍升逾2%,合力推高大市升破50日線並企穩。
聯儲局最近一改之前強硬鷹派作風,頻頻有官員輪流放鴿,家下市場唔再討論12月加息與否,又或者明年加息幾次,反而係憧憬最快幾時暫停加息。美國兩年加息周期有望暫停甚至完結,息口敏感嘅地產股有受捧,當然最受惠係陀地地產股,地產股普遍升3%或以上。
除咗加息周期有望終止,油價亦聽晒「侵侵」嘅話跌到一仆一碌,三桶油繼續受壓,相反航空股則受惠油價下挫而上升,加上人民幣走勢回穩,呢個板塊係時候翻身。暫時港股傾向做好多,咪再心思思做淡,至少50日線企穩咗,都係宜做好不宜做淡。
麥狄文
(徐狄怡‧證監會持牌人)