|
熱門:

2018年11月16日 即巿股評 港股直擊

【盤房來料】50日線未確認升穿前 維持上落市格局

之前幾日阿Man都提到,美股11月15日為年度基金贖回最後限期,美股之前幾日急跌,主要係因為基金為應付贖回沽貨現,只要捱過呢一吓沽壓,美股喺15日大有機會反彈。結果隔晚美股喺早段再挫近300點後,升幅收窄更半場拗腰反彈,最終三大指數均見反彈,當中又以納指升1.7%彈力較強。

至於港股噚日背靠A股上升,再加埋騰訊(00700)績後發力,恒指午後順利升破10日線(25940)後再重返二萬六水平之上,走勢上似逐步逼近近日區間移動範圍25500-26500點部,且看今次呢否向上突破,好友喺11月嚟個大反擊。今早恒指低開61點,一度借A股早段腳軟而回吐,10日線得而復失,盤中曾跌逾200點,低見25850點。但其後A股轉跌為升,港股回勇倒升,盤中最高見26197點,逼近50日線(26273點)。恒指中午報收26190點,升86點;國指則升33點,報收10589點。

騰訊雖然被多間大行調低目標價,但大部份仍維持其買入評級,北水噚日未有趁騰訊上升而沽貨,反而繼續掃貨,支持騰訊股價繼續向上。早段其股價曾回落至285.8元半日低位,但呢個位正正係反彈上升嘅首個阻力位,阻力能上破則變成支持,喺285元水平站穩腳後,半日升0.8%至290.4元。其他重磅股窄幅上落,未見開始發力,不過幾隻重磅股似乎醞釀爆上,暫時咪諗住手多做淡,逆市而行通常無乜好結果。

中央加強監管民辦幼私兒園,教育股全線被拋售,唔少教育股都進駐跌幅榜,其中以楓葉教育(01317)跌16.8%最傷,21世紀教育(01598)、天立教育(01773)、睿見教育(06068)緊隨其後,跌14.7至15.8%不等。而宇華教育(06169)及博駿教育(01758)亦錄得超過一成跌幅,寧買當頭起,莫撈當頭跌,教育股暫未宜入場博反彈,只有概嘆內地股份往往都係受政策變改左右。

另一個較慘情嘅板塊係醫藥股,今日弱勢持續,不過跌幅有所收歛,當中神威藥業(02877)更收復早段失地持平,若然股價能守穩10元水平,值得留意。但係偏重生化科技嘅醫藥股要份外小心,喺美國同類股份近日弱過藥煲,未知幾時見底。

講番大市走勢,暫時25800點由昨日早段阻力變成支持,初步阻力喺50日線(26273點)附近,之前兩次大市升抵50日線前即急回,未知今次會否照辦煮碗。若然大市未能走出區間上落格局,唔排除升抵50日線又掉頭。不過昨日挾淡倉有番一定氣勢,若然指數升穿26200點後企穩,唔排除喺26000至26200點水平駐紮嘅淡友先撤退,短線將退守至26500水平,亦即係熊證街貨重貨區之所在。大市擺脫上落市格局言之尚早,加上月底係G20峰會,中美兩國元首會面,能否為貿易戰打開缺口為關鍵,唔排除喺G20峰會前,大市仍保持上落市格局。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。