|
熱門:

2018年11月9日 即巿股評 港股直擊

【盤房來料】港股失守10日線反彈或結束

隔晚美國聯儲局議息後維持利率不變,會後聲明反映加息路徑不變,喺12月加息機會超過八成,美股反應尚算溫和,可能市場都預期12月再加多一次息,三大指數個別發展,道指升10點,標指跟納指下跌。不過美匯指數又走強,對新興市場嚟講唔係好兆頭,港股隔晚喺ADR已失守26000點,淡友大反擊,上星期五被挾逾千點,今日有仇報仇,乜嘢熊二大反彈行埋一邊。

恒指裂口低開302點,其後一路拾級而下,期間未有一下似樣反彈,好友全軍盡墨,大市愈踩愈深,加上內銀AH股急插,恒指最多跌642點,半日報收25601點,失守10日線(25630點),接近半日低位25583點收市。國指則跌284點,報收10419點,幅遠遠超過內地股市。恒指失守10日線,更回補11月2日遺下嘅上升裂口,差一百點左右已完全回補。

以為內銀業績唔錯可以靠呢個板塊帶動大市繼續反彈,結果不似預期,市場擔心內銀要侷住向民企大開水喉,仲要降低貸款利率,唔單止令資產質素下降,淨息差或受更大壓力,半日被狠沽。四大內銀跌幅由2%至3%。內險股同樣捱沽,強如平保(02318)半日亦要跌2.3%,其他內險股跌幅更超過3%。

除咗中資金融股表現不濟,騰訊(00700)呢隻重磅股業績前被大行唱淡,加上由250元反彈至300元水平,即使下周業績不至差過預期,亦已反映,股價失守292元重要支持,股價跌勢更急。至於其他科技股亦全線向下,瑞聲(02018)派完季度成績表又被券商唱淡,跟舜宇(02382)齊跌逾4%。其他新經濟股全面插水,股價閒閒地跌5%以上。

話咗汽車股同濠賭股咪博反彈,果然呢兩個板塊愈跌愈有,汽車股銷量今年被睇淡,明年亦唔會有改善,股價跌逾2%,即使東風(00489)上月銷量表現唔錯,亦要跟大隊跌4%。濠賭股跌完再跌,季度業績強差人意,全年業績及明年盈預測被調低,成個板塊無眼睇。

之前一個星期大市喺25500至26500點區間內上落,市場一度憧憬貿易戰有曙光,熊二反彈或可更上一層樓,事實上50日線即26500水平阻力龐大,三度挑戰不果,淡友即借美滙指數轉強反搫。基本上指數失守25800點,即25800至26200點大形下跌裂口底部,反彈或已告一段落。若然25500水平向下突破,脫離千點移動區間範圍,大市再回補餘下兩個下跌裂口後,將再向下尋底,下一支持大約喺日線保力加通道底部,即24400水平。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。