美國中期選舉結果一如預期,民主黨贏得眾議院而共和黨保住了參議院。普遍分析認為,特朗普政府推行經濟刺激政策的難度將會加大,美元將受不利影響,而對人民幣卻構成利好。筆者早已預計港股迅速反映「好消息」,先升後回好合理,點知恒指竟然在下午一個小時內由日中高位26530,急插610點落到25920,令淡友深信50天線(26583點)係個理想做淡位。
下晝個市高台跳水,當然也跟足A股走,不過A股又何故插水呢?有戰友留意話係美國國務卿蓬佩奧(Mike Pompeo)擱置與北韓高層官員會面的計劃,可能預示北韓局勢又轉緊張,此消息出街時間大概係下午1時15分左右,跟港股大開倒車的時點吻合。
正如之前說,11月港股投機誘惑多,不過市場雜音似乎更多,甚至權威外電消息也不可盡信。所以還原基本步,暫時以個股先行,趁反彈執番靚個倉。我對傳統收息股戒備愈來愈大,繼煤氣(00003)之後,中電(00002)及恒生(00011)先後由強勢(綠燈)轉為弱勢(紅燈),真正避險的只有持現金。
另外,熱門半新股亦係一個高危地帶,尤其係今年以高估值上市之獨角獸,另外禁售期一過亦可以很波動。筆者對3400億市值的美團(03690)最為吃驚,「外賣+團購」的商業模式可以值幾多倍PE呢?公司亦無投入高科技研發,股價由50元以下回升至62.05元,我不認為股價從此見底,小心中伏。
羅崇博 (杜比)