美股隔晚又玩過山車，早段美股高開，道指一度反彈重上25000水平，升逾300點，當時港股夜期亦跟隨重上二萬五，道指跟恒指叮噹碼頭。可惜其後科技股跟汽車股沽壓沉重，拖累美股三大指數一度挫逾1%，道指最傷時曾跌逾500點，令道指高低波幅超過900點，其後跌幅收窄，但納指仍然好傷，跌1.6%或116點。至於港股夜期升幅當然縮晒水，ADR更跌逾300點，低見24400水平。美股升完又跌過，主要係因為市場認為即使下月G20即使出現「特習會」，但貿易議題將被剔除，即係中美貿易關係仍未能獲得解決，最怕係雙方會面意見不合，關係更有可能惡化。
而另一方面有傳聞指，美國喺12月將向所有中國進口商品徵收關稅，即係呢一次再向餘下約2750億美元進口商品徵稅，貿易戰仲未有耐結束，叫市場豈能放心。
今日係期指結算日，港股表現極為反覆，當然恒指波幅未有道指咁誇張，半場波幅都係300幾點，缸邊友應習以為常。由於人民幣再受壓，早段A股表現偏軟，港股亦曾跌271點，見24541點近年半低位。其後阿爺又發功，中證監喺開市期間罕有地發聲明，指正在按照國務院金融穩定委員會嘅統一部署，圍繞資本市場改革，加快推動三方面工作，包括鼓勵上市公司開展回購跟併購重組、減少交易阻力，增強市場流動性、引導更多增量中長期資金進入市場。阿爺出到聲， A股當然要畀面，上證拗腰倒升18點，港股跌幅亦隨之收窄，重上24700水平，半日跌42點，報收24769點；國指則倒升47點，加保一萬大關，中午報收10060點。
不過美國嘅科技股風聲鶴唳，香港呢邊嘅科網龍頭騰訊(00700)繼續捱沽，盤中曾低見253.2元近年半低位，中午隨大市收窄跌幅，報收256元，跌1.5%。其他科技股同樣捱沽，小米集團(01810)跌至上市新低11.4元，中午報收11.66元，跌3%。美團點評(03690)半日亦跌4%，其他所新經濟股不提也罷。而舜宇(02382)跟瑞聲(02018)跌勢未止，暫時整個科技板塊都係避之則吉。
至於金融股踏入業績期，股價表現個別發展，大笨象(00005)急升未見回吐，目前喺63元樓上整固，都係嗰句，股價唔重上20日線之上，都只係反彈，未算完全扭轉弱勢。至於平保(02318)業績不過不失，但公司出到回購呢一招，早股股價隨大市下跌，但中午前已收復失地並人倒升近1%。不過被大行狂劈目標價嘅中銀香港(02388)就慘慘豬，股價半日急跌4%，講真論質地要揀本地業績嘅銀行股，揀恒生(00011)亦唔會揀中銀香港。內銀股則隨內地金融股反彈，睇番建行(00939)同工行(01398)似喺現水平築底，但當然後市表現仍取決港股個大方向點行，美股有乜冬瓜豆腐，阿爺再出多三十六招，港股跟A股都未必有得救。重點係人民幣貶值壓力未減，雖然七算呢條警界線，預咗阿爺會死守，只不過人民幣弱到咁嘅款，中港兩地股市唔再大跌已謝天謝地。
麥狄文
(徐狄怡‧證監會持牌人)
