熱門:

2018年10月26日 即巿股評 港股直擊

【盤房來料】人保列入觀察名單

隔晚美股報復式反彈,曾帶領港股夜期跟ADR重上二萬五水平,今朝恒指亦順勢高開。可惜亞馬遜跟谷歌母公司喺美股收市後公布業績,收入差過預期,拖累兩股美股收市盤後急挫,道指期貨亦顯著下跌逾1%。加上人民幣今早再受壓,離岸價失守6.97水平,A股先升後跌,拖累港股高開後急轉彎倒跌。

恒指今早高開37點,開市後曾升67點,見25062點半日高,其後外圍期貨市場愈跌愈多,恒指盤中最多跌405點,低見24589點,創逾17個月新低。恒指中午收報24642點,跌351點;國指則跌168點,險守一萬大關,中午報收10007點。

科技股被血洗勿接飛刀

重磅股方面,騰訊(00700)跌穿前底見259.4元,創16個月新低,半日跌3%,睇見咁多牛證街貨處於260元至265元呢個區間,大戶當然要KO呢堆肥牛。舜宇(02382)畀大行狠劈目標價,半日瀉9.7%;瑞聲(02018)創29個月低,其他科技股跌3%係最低消費。兩大美國科技巨頭急挫,美國嘅科技股今晚可能被血洗,隔晚嘅反彈或化為烏有,暫時咪多手諗住接飛刀,科技股呢個板塊,仍然係避之則吉。其他重磅股亦普遍下跌,當中又以中資金融股表現較差,尤其內險股更跑輸整個板塊。國壽(02628) 第三季純利按年挫76.3%,股價半日插6.8%;連呢期表現較為硬淨嘅平保(02318),股價半日亦要跌2.7%,留意公司下周一公布季度業績,份成績表稍有差池,股價隨時又要考驗前低位。

人保H股估值有望上番啲

雖然今日內險股表現較差,近期呢個板塊都係眼看手勿動,不過中國人保集團(01339)喺本周一宣佈,發行不超過18億股A股,公司喺咁嘅情況下,有呢個動作都算勇。集團實施戰略配售,透過發行A股畀符合其發展戰略要求嘅投資者,有助提升長久協同效益。而一向發行A股後,H股嘅估值都會有所提升,今次人保集團A股上市在即,估計H股估值可以上番啲。目前人保務業務領域涵蓋財產保險、人壽保險、健康保險、資產管理、保險經紀以及信託、基金等等,形成保險金融產業集群跟綜合經營集團架構。而集團子公司中國財險係內地及亞洲最大財險公司,市場份額第一,可以算得上係國際級數嘅保險集團。

而中國銀保監嘅「報行合一」口跟財險行業嘅車險手續費自律,預計能減輕車險承保端壓力,有望利好人保稅率情況。同時,快速擴張嘅非車險業務,預計仍可為集團穩定嘅保費同埋承保利潤增長。之前有大行報告表示,人保正加快轉型壽險業務,配合財險業務嘅市場領導地位,以及A 股發行,預計將繼續支撐人保集團估值修復。建議收集人保,目標價4港元。

其實除咗平保(02318)之外,人保係內地數一數二嘅巨無霸財險公司,喺內地嘅品牌優勢,再加埋深厚客戶基礎,其財險龍頭地位穩如泰山,其實級數可以算係國際級。但目前人保財險喺有接近15%股本回報率之下,PE竟然8倍唔夠,相對國際大型保險公司,市盈率閒閒地10倍以上,人保存一定折讓,未來估值必然會逐漸體現,跟國際領先保險公司接軌。不過目前港股市況認真麻麻,仍要向下尋底,咁先將人保列入觀察名單,待市況回穩,人保係優先考慮可以買入嘅內險股。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads